اسلام آباد۔6مئی (اے پی پی): سول ملٹری ءُ سیاسی سروکی ءَ ماتیں وطن ءِ رکھینگ ءِ ھاترا پاکستان ءِ مھکمیں جزم ءِ پدا زور داتگ ءُ اے گپ پدر کتگ کہ راج ءِ سرجمیں کمک ءَ گوں پاکستان ءِ سلاہ بندیں اُرد راجی طاقت ءُ ریاستی ادارگ آنی دگہ درستیں عناصر آنی کمک ءَ پاکستان ءِ ایمنی ءُ ھرچ ءُ درچ ءِ رکھینگ ءِ ھاترا سرجمی ءَ تیار انت۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ مزن وزیر محمد شہباز شریف ءَ گوں نائب مزن وزیر ءُ درئی کارانی وزیر اسحاق ڈار، دیمپان ءِ وزیر خواجہ محمد آصف ءُ سلاہ بندیں اُرد ءِ سروک آنی گوما انٹر سروسز انٹیلی جنس (آئی ایس آئی) ءِ تر ءُ تاب کتگ۔ تر ءُ تاب ءِ ساھت ءَ مزن وزیر ءَ را پاکستان ءِ رودراتکی سیمسر ءِ سر ءَ بھارت ءِ گیش بوھوکیں زوراکی ءُ آشوبی رویہ ءِ رد ءَ استیں سیکورٹی جاور ءُ برجاھیں ھوپ ءَ گوں گر ءُ چیل بوھگ ءِ گامگیج آنی ھوالگ ءَ سرجمیں بریفنگ دیگ بوت۔ قردات دمگی ایمنی ءِ دیم ءَ آیوکیں چیلنج ءُ پیداکیں ھترہانی بابت ءَ سرپد اِنت کہ ایشی ءِ تہ ءَ روایتی فوجی آپشن، ھائبرڈ جنگی رھبند ءُ ناشرکارانی پراکسی ھوار اَنت۔ مزن وزیر ءُ آئی ءِ ھمراہ ءَ راجی نگرانی ءَ را گیش کنگ، ادارگ آنی نیام ءَ بے رکاوٹیں کمک ءُ آپریشنل تیاری ءَ را مھکم کنگ ءِ ضلورت ءِ سر ءَ زور پر دات تانکہ پاکستان ءِ وت واجہی ءُ علاقائی یکوئی ءِ ھرچ وڑیں خلاف ورزی ءَ را گر ءُ دار کنگ ءُ فیصلہ کنوکیں رنگ ءَ پسو دیگ بہ بیت۔ مزن وزیر شہباز شریف ءَ آئی ایس آئی ءِ انٹیلی جنس ءِ مہارت ءُ اسٹریٹجک وژن ءُ بدل بوھوکیں جاور آنی تہ ءَ راجی مفاد آنی رکھینگ ءُ راجی سلامتی ءِ ھوالگ ءَ پیسلہ کنگ ءِ تہ ءَ آئی ءِ ھاسیں کرد ءَ را ساڑات۔ مزن وزیر ءَ گوشت کہ سرجمیں راج مئے بہادریں سلاہ بندیں اُرد ءِ پُشت ءَ اوشتاتگ۔ پاک فوج دگنیا ءِ نظم و ضبط ءُ نظم ءُ ضبط ءِ واھندیں اُرد آنی تہ ءَ یکے زانگ بیت۔ مزن وزیر ءَ پاکستان ءِ مھکمیں جزم ءِ سر ءَ زور پر دات کہ آ وطن ءِ رکھینگ ءِ ھاترا ھرچ وڑیں ھترہ ءِ ھلاپ ءَ بہ بیت، ءُ اے گپ ءِ پدر کنگ ءَ گوشت کہ پاکستان ءِ سلاہ بندیں اُرد راج ءِ سرجمیں کمک ءَ گوں راجی طاقت ءُ ریاستی ادارگ آنی سرجمیں عناصر آنی کمک ءَ پاکستان ءِ ایمنی ءُ شرپ ءِ برجائی ءِ ھاترا سرجمیں رنگ ءَ پابند بنت۔
