اسلام آباد۔ 06مئی (اے پی پی) بنجائی وزیر موسمیاتی بدلی و چاگڑدی رابطہ ڈاکٹر مصدق ملک سے شنبے نادے آ داڑے نیشنل ڈیزاسٹر مینجمنٹ اتھارٹی (این ڈی ایم اے) نا کنڈآن اڈہلوک ’’ارٹ میکو پاکستان ایکسپو آفت آتیان بچنگ‘‘ نا بناءِ کرے و پاکستان نا آفت آتیان بچنگ و موسمیاتی ریزیلینس کن سوگو عزم انا درشانی ءِ کرے۔ ڈاکٹر مصدق ملک سفیر، پارلیمنٹرینز ، اقوام متحدہ نا نمائندہ، انسانی ہمدردی نا ادارہ، تعلیم نا چاہندار ونجی بشخ انا راہشون تیا تالان بشخ ہلوک آتیان تران کرساپاکستان نا آفت آتون مون تننگ اٹ قائدانہ کڑد انا ذکر ءِ کرے و پارے کہ پاکستان دنیا نا موسمیاتی رداٹ غٹ آن زیات زہمی ملک آتیٹی اوار ءِ۔ بنجائی وزیر پارے کہ دا ایکسپو پاکستان نا دابدل مفروک عزم انا ڈیک ءِ کہ نن بنائی وارننگ سسٹم، ہندی کہول انا ردعمل نا وڑوڈول و جہانی کمکاری نا کمک اٹ آفت آتون مون تننگ نا لائخی تے سوگو کینہ۔ پاکستان چیلنج آتے وارخواہی تیٹی بدل کرسا این ای او سی کون آ ہندی ادارہ غاتے جوڑ کرے و علاقائی شریدار آتون تکنیکی مہارت ناتبادلہ ءِ کرسا خیرخواہی و سفارتی اثرورسوخ دوئی کرے۔ بنجائی وزیر 2022ء نا بھسکار نوکاپ کون آ موسمیاتی آفت آتا اثرآتا ذکر ءِ کرسا سول و عسکری ادارہ، این جی او و شونداری شریدار آتا اسیجائی کوشست آتاستاءِ کرے۔ اوموسمیاتی مالیاتی کمکاری و کاربن مارکیٹ اسکان رسینگ کن جہانی کمکاری نا گرج آہم زور شاغا تانکہ پاکستان نا گلیشیئر، خور و آبی وسیلہ غاتے رکھ کننگ مرے۔
