اسلام آباد۔ 06مئی (اے پی پی) بنجائی وزیر قومی غذائی رکھ وپٹ وپول رانا تنویر حسین نا کماشی ٹی بڑزکو کہولی دیوان اڈ ہلک ہراٹی برنج و کرپاس نا بج آتا دوئی کننگ و اوفتا ضابطہ کار نا جاچ ءِ ہلنگا۔ غیرکانودی بج آتا بہا و کشاری پیدوار اٹی گچینی کن گام گیج آتیا سرجمی اٹ سجفنگا۔ داوخت آ پاننگاکہ آخبت دسنگ نا سیزن کن کرپاس نا بج آتا جم گرج 53،796میٹرک ٹن ءِ وخت اس کہ 50،000میٹرک ٹن آن زیات بج مہالو آن دوئی ارے، مچ آملک اٹی کرپاس نا بج آتا اسہ وڑاسے نا ہم کاختی اف۔ بنجائی وزیر بے پک بج آتا بہاغا سخت گڑتی نا درشانی ءِ کرے و پارے کہ مارکیٹ اٹی بے آب و جعلی بج آتا دوئی کننگ عام ءِ ۔ دیوان ءِ پاننگاکہ کیہی کمپنی دا غیرکانودی کاروباراٹی اوار خننگانو۔ دا چرجوئی ٹی وزارت 392 کمپنی تیا پابندی خلکنے ہرا بے پک و جعلی بج فراوان کریرہ۔ بنجائی وزیر ہندی کہول آ بج آتا تیاری نا اہمیت آ زور شاغسا پارے کہ درآمدی بج آتیا سیبو ءِ کم کننگ و ہندی وڑانا آب ءِ گچین کننگ کن گام گیج برجاءِ۔ اوپارے کہ پک بج آتا کاریم اٹ اتنگ ءِ مون آ درسا نن فی ایکڑ پیدوار اٹی نمان ودکی و کشاری بشخ اٹی پائیداری اتنگ کینہ۔ اوپارے کہ پاکستان ہراوخت اس کشاری جدت طرازی ٹی بھارت آن مون آئس، داافسوزناک ءِ کہ اینو نن بج آتا آب و پیدوار نا باندات اٹی بھارت نا درور ایتنہ ۔ اوبھارتی بج آتا اسمگلنگ و سوشل میڈیا غا اوفتا آجو تشہیر آ ہم گڑتی نا درشانی ءِ کرے و پارے کہ وزارت تعلقدار ادارہ غاتون اواری اٹ دا غیرکانودی کاروبار اٹی اوار زموارآتا برخلاف سخت کارروائی کننگ ءِ۔ نہاد آتیٹی بے المی شیف بڑزی نا مون ءِ توننگ کن بنجائی وزیر گچین بج و پوسکن کشارگری نا وڑوڈول آتا کمک اٹ کشاری پیدوار اٹی ودکی آ زور شاغا۔
