دوحہ۔ 06مئی (اے پی پی) بنجائی وزیر داخلہ محسن نقوی قطر نا وزیراعظم محمد بن عبدالرحمان الثانی تون اوڑدہی کرے ہراٹی پاک قطر تعلقداری و ہڑتوم آ کنڈآتا کمکاری ءِ ودفنگ آ گپ وتران کننگا۔ اوڑدہی ٹی پاک بھارت بے چیٹی و ڈیہہ انا ساڑی حالیت آتارداٹ گپ وتران مس۔ وزیرداخلہ محسن نقوی قطر انا وزیراعظم ءِ پاک بھارت ساڑی آ بے چیٹی نا بابت پاکستان نا پبی و اصولی موقف آن معلومدار کرے۔ وزیرداخلہ محسن نقوی ڈیہہ اٹی امن کن پاکستان نا جوان گام گیج آتا بارواٹی حوال ترساپارے کہ پہلگام واقعہ غا بھارت نا بے بنداودوبہ و گام گیج آتیان ڈیہہ انا امن ءِ بھلو خطرہ اس مون تروک ءِ۔ پہلگام واقعہ نا بے کنڈ ہلوک جاست وپاست نا سلہ پاکستان نا اصولی موقف ءِ سوگو کیک۔ دنیا ءِ علم مرے کہ واقعہ نا ماسٹر مائنڈ و اصل دوبہ دار آک دیرءُ، و اونا بینفشری دیر ءِ۔ بھارت داواقعہ نا آڑاٹی سندھ طاس معاہدہ غا جلہو کرینے ہرا ننکن لائف لائن اسے۔ ڈیہہ اٹی دیرپاامن خوانہ ولے جارحیت آ چپ سلپنہ۔ قطر انا وزیراعظم پاک بھارت بے چیٹی ٹی کمتی کن سفارتی کوشست آتا گرج آ زورشاغساپارے کہ نن ڈیہہ اٹی عدم کشیدگی نا پالیسی نا مخ تف اُن۔ اومیت ءِ کہ سفارتی کوشست آتیان بے چیٹی کم مریک ۔ قطر انا وزیراعظم نا وزیراعظم محمد شہباز شریف کن نیک است خواہی نا کلہو ترساپارے کہ نما وزیراعظم بھاز خواری اٹ پاکستان نا زرگزران ءِ سہی کنڈآ دننگ ءِ۔ قطراٹی پاکستان نا سفیر محمد عامر و بڑزکو کمامدارآک ہم داوخت آ ساڑی ئسر۔
