اسلام آباد۔ 06مئی (اے پی پی) بنجائی وزیر خزانہ سینیٹر محمد اورنگزیب مسہ دے ئی سرکاری دورہ غا لندن آ روانہ مسنے، ہراڑے او برطانوی کمامدار، جہانی مالیاتی ادارہ، زرکاربینک و کاروباری ادارہ غاتون اوڑدہی کیک۔ وزیر خزانہ دادورہ ٹی چندی زرکاری فورم و سیمینارآتیان تران کیک ہرافتے ٹی او پاکستان نا زرگزرانی منظرنامہ و حکومت نا زرکاردوست پالیسی تے تالان کیک۔ دورہ ٹی وزیرخزانہ جیفریز نا کنڈآن ’’پاکستان اسکان رسینگ نا دے‘‘نا سرحال آن مروک آ زرکاری گول میز مذاکراہ ٹی بشخ ہلیک۔ داڑتون اوار اوار یوکے ٹیک انویسٹرآتون مروک آ مذاکرہ ٹی پاکستان اٹی اے آئی، کانڑکنی و ہیلتھ کیئرتون اوار ایلو بشخ آتیٹی زرکاری نا وارخواہی تیا گپ وتران کیک۔ وزیراعظم نا سلاہکار زرکاری محمد علی ہم دااوڑدہی و مذاکرہ غاتیٹی وزیرخزانہ تون اوار مریک۔ داوخت آ وزیرخزانہ برطانیہ نا درج ذیل اہم ادارہ غاتا دورہ ءِ کیک، ہیزمیجسٹیزٹریژری، فارن کامن ویلتھ اینڈ ڈویلپمنٹ آفس، آفس فار بجٹ ریسپانسبلٹی ، بینک آف انگلینڈ تون اوار داکان بیدس ڈوئچے بینک، سٹینڈرچارٹرڈبینک، کارگل گلوبل ٹریڈنگ یوکے و برٹش امریکن ٹوبیکو نا بڑزکو کمامدارآتون ہم اوڑدہی کیک۔ وزیرخزانہ برطانیہ نا گورنمنٹ کمیونی کیشن سروس نا سی ای او تون اوڑدہی آن بیدس پاکستانی ہائی کمیشن نا کنڈآن ہندی زرکارو کاروباری شخصیت آتا اعزاز اٹی تروک آ سُوارہ ٹی ہم بشخ ہلیک۔ دورہ نا ایسر آ وزیرخزانہ جہانی و برطانوی میڈیا تون اوڑدہی تیٹی پاکستان نا زرگزرانی پالیسی تے مون آ تخک و سوج آتا ورندی ءِ ایتک۔
