اسلام آباد۔ 06مئی (اے پی پی) اقوام متحدہ نا سلامتی کونسل نا بند کمرہ ٹی اسہ سلابتی دیوان اینو ایجنڈاآئٹم ’’بھارت پاکستان سوج‘‘ انا رداٹ اڈ ہلک۔ دفترخارجہ نا کنڈآن سے شنبے نادے آ جاری بیان نا رداٹ دیوان علاقائی سلامتی نا بگڑینگوک آ چاگڑد، بھارت وپاکستان نا نیام اٹ ودوک آ بےچیٹی و بھارت نا غیرکانودی وڑاٹ کوزہ ٹی جموں وکشمیر نا حالیت آتیا گپ وتران کن اڈ ہلک۔ دادیوان پاکستان نا خواست آ بھارت نا ساڑی آاسہ کنڈی گام گیج و اشتعال انگیز پڑوتا رداٹ بٹنگاسس ہراڑآن فوجی جھیڑہ غاتا خطرہ ٹی نمان ودکی مس و علاقائی و جہانی امن وسلامتی ءِ خطرہ مون تروک مسنے۔ دیوان اٹی کونسل نا باسک آک بے چیٹی نا ودوک آ خطرہ غا گڑتی نا درشانی ءِ کریر و تحمل و تناؤ ءِ کم کننگ نا دمدستی گرج آ زور شاغار۔ اوبے چیٹی ءِ کم کننگ و فوجی تصادم و جھیڑہ غاتیان بچنگ و ویل آتے پرامن وڑاٹ ایسر کننگ کن گپ وتران و سفارت کاری آ زور شاغار۔ کیہی باسک آک داہیت آ زور شاغار کہ جموں وکشمیر نا متکن آ جھیڑہ علاقائی نزوری نا بنداوی سوب ءِ و اودے سلامتی کونسل نا تعلقدار قرارداد و کشمیری الس نا است خواہی تا رداٹ ایسر کننگے۔ کونس نا کیہی باسک آک بھارت نا کنڈآن سندھ طاس معاہدہ نا معطلی نا بابت جہانی کانود و زمواری تاشرف آ زور شاغار ۔
