کوئٹہ۔ 06 مئی (اے پی پی) پاکستان مسلم لیگ (ن) نا مرکزی سینئر راہشون چوہدری نعیم کریم پارینے کہ پاکستان نا دفاع سوگو آ دُوتیٹی ءِ، پاک فوج ملک انا سیم تا رکھ ءِ کننگ ءِ جوان چاہک، بھارت و مودی سرکار غلط گمانی ٹی مفس ، پاکستان ایٹمی قوت ءِ و بھارت ءِ پبی ورندی تننگ نا لائخی تخک، فتح میزائل نا سرسہب آزموندہ دفاع وطن اٹ مزل نا نشان ءِ ، قوم ءِ تینا فوج و سائنسدان تیا گمر ءِ۔ مسلم لیگ (ن) بلوچستان نا رابطہ آفس آن جاری مروک اسہ بیان اسے ٹی چوہدری نعیم کریم پارے کہ پاکستان اسہ پرامن ءُ ملک اسے و پاکستان مدام ہروڑنا دہشت گردی نا مذمت ءِکرینے، دہشت گردی نا برخلاف جنگ اٹی پاک فوج، سیکورٹی فورس و الس تینا جون تے ندر کرینو۔ اوپارے کہ بھارت پاکستان آ جلہو کننگ نا غلطی ہم کپ ایلو دروشم اٹ بھارت ءِ زوراکی نا پبی ورندی ءِ تننگ پاک فوج جوان وڑاٹ چاہک ، ساڑی آ حالیت آتیٹی مچ آ قوم فوج اتون ہم کوپہ ءِ۔ او فتح سیریز ڈغار آن ڈغار اسکان خلوک آ میزائل نا سرسہب ہیلکاری آزموندہ غا قوم ءِ مبارکبادی ترسا پارے کہ دا سرسہبی پاکستان نا دفاعی تیاری، ٹیکنالوجی ٹی خودکفالت و قومی سلامتی نا عزم انا درشانی ءِ۔ اوپارے کہ فتح میزائل نا سرسہب آزموندہ دشمن ءِ پیدوار کلہو اسے کہ پاکستان تینا گل زمین نا دفاع کن ہروخت تیار ءِ ، ننا فوج انا کسبی مہارت و ننا سائنسدان و انجینئرآتا سخت خواری دا سرسہبی ءِ ممکن کرے، پوسکن نیویگیشن سسٹم آن شُپ فتح میزائل قومی دفاعی نظام اٹی اسہ سوگو ءُ ودکی اسے و داآزموندہ دشمن نا جارحیت نا برخلاف گچین ردعمل تننگ نا پاکستان نا لائخی ءِ پک کرینے۔
