اسلام آباد۔6مئی (اے پی پی): وفاقی وزیر خزانہ سینیٹر محمد اورنگزیب سئے روچی سرکاری تر ءُ تاب ءِ واستہ لندن ءَ شتگ، اودا آ برطانیہ ءِ حکام، میاں اوستمانی مالیاتی ادارگ، سرمایہ کاری بینک ءُ کاروباری ادارگ آنی گوما گند ءُ نند کنت۔ تر ءُ تاب ءِ ساھت ءَ وزیر ءِ ھزانگ جتا جتائیں سرمایہ کاری فورم ءُ سیمینار آنی تہ ءَ گشتانک دنت ایشی ءِ تہ ءَ پاکستان ءِ اقتصادی منظر نامہ ءُ حکومت ءِ سرمایہ کار دوستیں پالیشی آناں پدر کنت۔ تر ءُ تاب ءِ ساھت ءَ آ وزیر ھزانگ جیفریز ءِ نیمگ ءَ برجم داشتگیں ’’پاکستان رسائی ءِ روچ‘‘ ءِ سرھال ءَ سرمایہ کاری ءِ گول میز ءِ تہ ءَ بھر زوری کنت۔ ایشی ءِ گوما برطانیہ ءِ ٹیک سرمایہ کار آنی گوما گپ ءُ تران ءَ اے آئی، کان کنی ءُ جان سلامتی ءِ ھواریں شوبگ آنی تہ ءَ پاکستان ءَ سرمایہ کاری ءِ موہ آنی سر ءَ گپ ءُ تران کنگ بیت۔ اے گند ءُ نند ءُ گپ ءُ تران ءَ وزیر ءِ ھزانگ ءِ ھمراہی ءَ مزن وزیر ءِ سرمایہ کاری ءِ مشورہ محمد علی ھم ھوار بیت۔ اے وھد ءِ تہ ءَ وزیر ھزانگ برطانیہ ءِ رد ءَ ھاسیں ادارگ آنی تر ءُ تاب ءَ کنت، ایشی ءِ تہ ءَ ہیز میجسٹیز ٹریژری ،فارن کامن ویلتھ اینڈ ڈویلپمنٹ آفس،آفس فار بجٹ ریسپانسبلٹی،بینک آف انگلینڈ ھوار اَنت۔ ایشی ءَ ابید آ ڈوئچے بینک، سٹینڈرڈ چارٹرڈ بینک، کارگل گلوبل ٹریڈنگ یوکے ءُ برٹش امریکن ٹوباکو ءِ مزنیں کارندہ آں گوں ھم گند ءُ نند کنت۔ برطانیہ ءِ حکومتی کمیونیکیشن سروس ءِ سی ای او ءَ گوں گند ءُ نند ءَ ابید وزیر ءِ ھزانگ پاکستان ہائی کمیشن ءِ نیمگ ءَ دمگی سرمایہ کار ءُ کاروباری مردم آنی شرپ ءَ برجم داشتگیں شپ ءِ ورگ ءِ تہ ءَ ھم بھر زوری کنت۔ تر ءُ تاب ءِ گڈ ءَ وزیر ءِ ھزانگ ءَ میاں اوستمانی ءُ برطانوی میڈیا ءِ گوما گند ءُ نند ءَ پاکستان ءِ اقتصادی پالیسیانی سر ءَ رژنائی شنگ کنت ءُ جست ءُ پرس ءِ پسو ءَ دنت۔
