اسلام آباد۔ 05 مئی (اے پی پی) بنجائی وزیر حوالکاری و شینکاری عطاء اللہ تارڑ جہانی و ہندی میڈیا تون اوار لائن آف کنٹرول (ایل او سی) نا ہموعلاقہ غاتا دورہ ءِ کرے ہرافتے وار وار آ پاکستان اٹی مبینہ دہشت گردی نا ٹھکانہ گوندسا کرینے، دورہ نا مسخت بھارتی پروپیگنڈا ءِ راستی تا کمک اٹ بے نقاب کننگ ئس تانکہ دنیا تینٹ خنے کہ بھارت نا کنڈآن خلوک آ دوبہ غاک ہراحداسکان بے بنداو، سٹی وریفوک ءُ۔ وزارت حوالکاری و شینکاری نا کنڈآن ہندادورہ ٹی آسراتی فراوان کننگا۔ میڈیا نا نمائندہ غاتے ہموخاص انگا ہند آتیا دننگا ہرافتے بھارت نا کنڈآن مبینہ دہشت گردی نا ٹھکانہ گوندنگاسس۔ راستی ، ہندی آبادی نا شاہدی و حالیت آتا تینٹ مشاہدہ ءِ کرسا میڈیا دا بھارتی دعویٰ تا حقیقت ءِ ہُننگ نا موقع دوئی کرے۔ داوخت آ گپ وتران کرسا بنجائی وزیر حوالکاری عطاء اللہ تارڑ پارے کہ بھارت نا کنڈآن وار وار آ پاکستان نا برخلاف بے بنداو دوبہ خلنگا ولے اینو نن جہانی و ملکی میڈیا نا مون آ غٹ راستی تے تخانن، ہراہند آتے بھارت خیالی دہشت گرد کیمپس گوندسا کرینے، او اصل اٹ لس شاری آبادی نا علاقہ غاک ءُ۔اوپارے کہ پاکستان اسہ زموار ءُ ریاست اسے ہرا نئے بیرہ علاقائی بلکن جہانی امن کن ہم سنبرینگوک ءِ۔ عطاءا للہ تارڑ مستی پارے کہ پاکستان دنیا نا ہراکہ بشخ مرے دہشت گردی یا دہشت گردانہ سرجزآتا مذمت ءِ کیک، نن تینا عمل آن وار وار آ پک کرینن کہ نن امن نا خواہندار اُن ولے تینا وتواجہی نا دفاع کن نن ہرحداسکان ہِننگ کن تیار اُن۔ بنجائی وزیر حوالکاری پارے کہ بھارت اسہ کنڈآ پاکستان آ دوبہ خلنگ ءِ وایلو کنڈآ او تینٹ تینا غیرکانودی کوزہ ٹی جموں و کشمیر اٹی انسانی حق انا بھلا خلاف ورزی تیٹی اوار ءِ۔ بھارت تینا داخلی سرسہبی تے اودیم کننگ کن لائن آف کنٹرول آ پروپیگنڈا کیک ولے اینو جہانی میڈیا تینٹ تینا خن تے اٹ اصل حقیقت ءِ خنانے۔ اوپارے کہ پاکستان اسہ وار ولدا دنیا نا مون آ پیدوار کرینے کہ او علاقائی امن کن سنبرینگوک ءِ ولے ہربھارتی جارحیت نا دمدستی و پبی ورندی ءِ تننگک۔
