اسلام آباد۔ 05مئی (اے پی پی) بنجائی وزیر واپار جام کمال خان جاپان نا سفیر تون اوڑدہی کرے ہراٹی ہڑتوم آ کنڈآتا واپاری تعلقداری تے سوگو کننگ وبھلو وخت اسے آن ساڑی ٹیرف نا بابت ویل آتا ایسری آ گپ وتران کننگا۔ وزیر واپار سلاہ تس کہ پاکستان و جاپان نا نیام اٹ واپاری تعلقداری تے پین مون آ دننگ کن خصوصی بزنس فور م اس اڈتننگے۔ جام کمال خان پارے کہ جاپان ءِ پاکستان نا برآمد آتیٹی دمدستی ودکی المی ءِ انتئے کہ دا بھلو وخت اسے آن جمود نا گواچی ءُ۔ اوپارے کہ مالی سال 2023-24اٹی ہڑتوم آملک آتا نیام اٹ واپاری کچ 1.33ارب ڈالر ئس ہراٹی پاکستان نا برآمد آک بیرہ 19 کروڑ 40 لکھ ڈالر وخت اس کہ جاپان آن درآمد آک 1.137 ارب ڈالر ئسر۔ اوڑدہی ٹی سیکرٹری واپار جواد پال جاپان تون اولیتی واپاری معاہدہ نا گرج آ زور شاغا تانکہ منصفانہ مسابقت و بریبر ٹیرف ءِ پک کننگ مرے۔ اوپیدواری کرے کہ پاکستانی مصنوعات آتے جاپانی منڈی ٹی بڑزکو ٹیرف اڑاند مون تروک ءِ ہراڑآن اونا مسابقتی لائخی زہمی مننگ ءِ۔ جاپان نا جنرلائزڈ سسٹم آف پریفرنسز نا رداٹ پاکستان نا ٹیکسٹائل مصنوعات آتیا اوسطاََ 5.36 درسد وخت اس کہ سِل انا مصنوعات آتیا ٹیرف ریٹ کوٹہ نا رداٹ اوسطاََ 16 درسد ڈیوٹی عائد ءِ۔ جاپانی سفیر بزنس فورم نا سلاہ نا ستاءِ کرے و پاکستانی برآمد آتے مون تروک بڑزکو ٹیرف نا بابت خدشہ غاتے امنا کرسا باوری کرفے کہ دا ویل آتے مُرکننگک۔ وزیر واپار کاروباری سفر ءِ آسان کننگ کن کیہی وار داخلہ والا ویزہ غاتا اہمیت آ زور شاغا و جاپانی زرکارآتے پاکستان نا ٹیکسٹائل، سِل، سرجیکل و سمندری خور انا بشخ آتیٹی زرکاری نا سلہ خلک۔ اوپارے کہ اوساکاایکسپو2025اٹی پاکستان نا ٹائب ۔سی پویلین ءِ مچ آ دنیا غان بروک آ زرکارآتا کنڈآن جوان ستاءِ کننگ انگ ءِ۔ اوپارے کہ وزیراعظم شہباز شریف زوت جاپانی سفیر و جاپانی کمپنی تا نمائندہ غاتون اوڑدہی نا مہمانداری ءِ کیک تانکہ واپاری و زرکاری نا وارخواہی تیا گپ و تران کننگ مرے و تین پہ تینی اقتصادی کمکاری ءِ مون آ دننگ مرے۔
