اسلام آباد۔ 05مئی (اے پی پی) بنجائی وزیر حوالکاری وشینکاری عطاء اللہ تارڑ پارینے کہ بھارت نا کنڈآن پاکستان آ دروغ انا دوبہ خلنگ پوسکن ءُ ہیت اس اف، بھارت مدام پاکستان ءِ بدنام کننگ کن دروغ آ تالان بیانیہ جوڑ کرے ولے پاکستان ہرموقع غا زمواری، شفافیت و حقیقت آ تالان ردعمل تس، اینو میڈیا ءِ لائن آف کنٹرول نا ہموعلاقہ غاتا دورہ ءِ کرفین ہرافتا بارواٹی بھارت دہشت گردی نا خیالی کیمپس نا دروغ پروپیگنڈاکرے، لائن آف کنٹرول تون غٹ ہنکینی علاقہ و چارمہ کنڈ زند ہڑدے نا رداٹ ءِ۔ دوشنبے نادے آکنٹرول لائن نا دورہ نا وخت آ میڈیا تون گپ وتران کرسا عطاء اللہ تارڑ پارے کہ آزاد کشمیر نا علاقہ بیلانور شاہ و پیر چناسی نا بابت بھارتی دوبہ غاک سٹی و بے بنداو ءُ، داڑے نئے بیرہ ہندی آبادی ہڑدے ئی زند ءِ تیر کننگ ءُ بلکن تعلیمی ادارہ غاک ہم داڑے ساڑی ءُ و سیل و سوات ہم ہڑدے نا رداٹ برجاءِ۔ اوپارے کہ دا علاقہ غاتیٹی نئے دہشت گردی نا کیمپ اس ارے و نئے داوڑنا سرگرمی ہرانا بھارت دعویٰ ءِ کننگ ءِ۔ بنجائی وزیر حوالکاری پارے کہ بھارت نا کنڈآن 2019ء ٹی پلوامہ واقعہ غان پد ہم بالاکوٹ اٹی خیالی ٹریننگ کیمپ آتا راگ کننگاسس ہرانا نن راستی و شاہدی اتون ورندی ءِ تسن۔ داوار ہم بھارت نقشہ نا بنداو آ دروغ پروپیگنڈا کرے ولے نن است انا حب اٹ میڈیا ءِ موقع تسن کہ او تینٹ برے خنے کہ دا دوبہ غاک اخہ در بے بنداو ءُ۔ عطاء اللہ تارڑ پارے کہ پاکستان دہشت گردی نا برخلاف جنگ اٹی 90 ہزار آن زیات نہادی جون تا قربانی تسنے و اینو ہم دیکی سیم آ دہشت گرد آتا برخلاف پبی کارروائی برجاءِ۔ اوپارے کہ پاکستان اسہ زموار ءُ ریاست اسے ہراامن نا خواہندار ءِولے تینا سلامتی و وتواجہی نا دفاع غان لاپرواہ اف۔ اوپارے کہ پاکستان تون بھارت نا دہشت گردی ٹی اوار مننگ نا پبی شاہدی ارے۔ کلبھوشن یادیو اسہ زندہ ءُ درور اسے ہرا پاکستان اٹ تخریبی سرجزآتیٹی اوار خننگا و دزگیرمس۔ جعفرایکسپریس جلہو آن پد بھارتی میڈیا نا کنڈآن نئے بیرہ دہشت گرد آتیان فوٹیج دوئی کننگا بلکن اوفتے شینک کرسا خوشی نا درشانی ءِ کننگاحالانکہ داواقعہ دنیا نا سنگین انگا دہشت گردی نا واقعہ غاتیان اسٹ ئس۔ اوپارے کہ بی ایل اے نا کنڈآن پاکستان اٹی دہشت گردی نا واقعہ غاتیان پد بھارتی چینل آتیا اوفتا انٹرویو و بیان تا نشر مننگ داہیت انا شاہدی ءِ کہ دا زموار آتے بھارتی سرپرستی دوئی ءِ۔ اوپارے کہ پہلگام واقعہ ہرانا پاکستان تون ہچ ءُ تعلق اس اف، اودے بنداو جوڑ کرسا پاکستان آ دوبہ خلنگا حالانکہ ایف آئی آر واقعہ نا بیرہ دہ منٹ آن پد نوشتہ کننگا و انٹرنیشنل میڈیا ہم نشان تننگ ءِ کہ پہلگام واقعہ نا دروغ ویڈیو چلیفنگا۔ وزیرحوالکاری پارے کہ بھارت نا نہہ لکھ کوزہ گیر فوج بھارت نا غیرکانودی کوزہ ٹی جموں و کشمیر اٹی ساڑی ءُ، انت او بیرہ کشمیری الس آ ظلم کننگ کن تعینات ءُ؟ پہلگام واقعہ درحقیقت بھارتی سیکورٹی ادارہ غاتا بے سہبی ءِ۔ اوپارے کہ پاکستان آ دا فالس فلیگ آپریشن نا دوبہ ءِ خلنگ نا کوشست بے سہب مس انتئے کہ پاکستان واقعہ نا شفاف جاست وپاست نا پیش کش کرے ہراداہیت انا شاہدی ءِ کہ ننا دُوک ساف ءُ۔ اوپارے کہ ننا امن نا است خواہی ءِ نزوری تکنگپ، نن تینا دفاع ءِ کننگ چانہ۔ اوپارے کہ پلوامہ واقعہ غان پد بھارت ہراتم جلہو کریسس تو نن اِرا بھارتی جہاز خلکوسن بٹیسن و اوفتا پائلٹ ءِ ہم دزگیرکرین، اگہ بھارت پاکستان نا کنڈآ خراب انگا نظر اٹ ہرک تو دفاع ہنداخہ پبی وڑاٹ کینہ کہ بھارت نا نسل آک یات تخرہ۔ عطاء اللہ تارڑ پارے کہ بھارت نئے بیرہ ڈیہہ بلکن مچ آ دنیا ٹی دہشت گردی نا واقعہ غاتیٹی اوار خننگانے۔ امریکہ و کینڈا ٹی سکھ راہشون تا خون نا ڈٹ بندی ٹی ہم بھارت کڑد مون آبسنے۔ کینیڈا نا وزیراعظم پیدوار لوز آتیٹی پارینے کہ ہردیپ سنگھ نجر نا خون اٹی بھارت اوار ءِ ۔ بنجائی وزیر حوالکاری پیدوار کرے کہ لائن آف کنٹرول تون غٹ علاقہ غاک پرامن ءُ و ہموڑے نئے دہشت گردی نا کیمپ اس ارے نئے غیرمعمولی سرگرمی اس۔ بھارت نا پروپیگنڈا بیرہ دنیانا خن تیٹی مش چٹ تننگ نا کوشست اسے ہراداسہ پین سرسہب مننگ کپک۔
