اسلام آباد۔ 05مئی(اے پی پی) اسلامی کمکار تنظیم (اوآئی سی) نا آزاد مستقل انسانی حق کمیشن (آئی پی ایچ آر) اسلاموفوبک بیان، خارتس بیدادی و بھارت ناغیرکانودی کوزہ ٹی جموں وکشمیر اٹی مسلم کمیٹی تا برخلاف ٹارگٹڈ جلہو خاص وڑاٹ پہلگام اٹی ساڑی آ است ہسون واقعہ نا رداٹ خطرناک ودکی آ گڑتی نا درشانی ءِ کرینے۔ دوشنبے نادے آ ترجمان دفترخارجہ نا کنڈآن جاری بیان اٹی پاننگاکہ کمیشن مسلمان تے قربانی نا اِیٹ جوڑ کننگ و فرقہ وارانہ بیدادی کن بے کچ چپ دُوانا قوم پرست آتے ہُشکا تننگ نا مذمت ءِ کرسا داہیت آ زور شاغا کہ داوڑنا گام گیج آک انسانی حق انا جہانی کانود نا بھلو خلاف ورزی ءُ۔ او بھارتی حکومت آ زور شاغا کہ او احتساب ءِ پک کے، 200 ملین آن زیات مسلمان تا حق ءِ برقرار تخے و خار و استثناءِ چٹفے۔ کمیشن اقوام متحدہ و جہانی برادری آن خواست کرے کہ او حالیت آتیا سخت نظر تخر، آجوجاست وپاست آ زور شاغر، بھارت و بھارت نا غیرکانودی کوزہ ٹی جموں وکشمیر اٹی مسلمان تا بنداوی آجوئی تا رکھ ءِ کیر۔ کشمیر آ تینا موقف ءِ پک کرسا اوآئی سی نا ادارہ اقوام متحدہ نا سرکڑدہ ئی ٹی راستکی تے پٹوک آ مشن نا گرج انا ہم درشانی ءِ کرے و اقوام متحدہ و او آئی سی نا تعلقدار قرارداد آتا رداٹ کشمیری تا حق خودارادیت آ زور شاغا۔
