اسلام آباد۔ 05مئی (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ کشمیر آن فلسطین اسکان متکن آ ایسری نا چاری جھیڑہ غاک علاقائی و جہانی امن و سلامتی کن پدریسہ خطرہ ءُ، موسمیاتی بدلی تا منفی اثر و آب و ہواغان ودی مروک آ آفت آتا اثرآک نئے بیرہ سیم تیان پیشن بلکن چین تسکان ہم محسوس کننگ انگ ءِ، جہانی برادری نا اسہ زموار باسک اس مننگ نا ناطہ پاکستان علاقائی امن و سوگوی کن سنبرینگوک ءِ ، بے چیٹی ءِ کم کننگ نا غٹ کوشست آتا مخ تفی ءِ کینہ۔ داخیال آتا درشانی ءِ او دوشنبے نادے آ داڑے انسٹی ٹیوٹ آف ریجنل اسٹڈیز نا کنڈآن چارمیکو سالانہ ریجنل ڈائیلاگ 2025اٹی مہمان خاص نا حیثیت اٹ تران کرساکرے۔ اوپارے کہ دنیا درحقیقت ہنگامہ خیز دور آن گدرینگ انگ ءِ، ننے چندی باہم گنڈوک تنکی مون تروک ءِ ہرا جہانی امن و سلامتی، اقتصادی سوگوی، و پائیدار شونداری کن خطرہ ءُ۔ نائب وزیراعظم پارے کہ جھیڑہ و پدریسہ درملکی کوزہ بروک آ چین تے جنگ انا لعنت آن بچفنگ و خودارادیت نا ضمانت تننگ نا اقوام متحدہ نا قول آتا نفی ءِ کرینے۔ سینیٹر محمد اسحاق ڈار پارے کہ جہانی مالیاتی نظام اٹی ساختی خامی تے مر کننگ اٹ ننا بے سہبی جہانی بے بریبری و نیزگاری ءِ ودفنگ ءِ ، خار و امتیازی سلوک زینو فوبیا و اسلاموفوبیا نا دروشم اٹ ودنگ ءِ۔ اوپارے کہ بدبختی اٹ ننا ڈیہہ اسہ وار ولدا اسہ پین جھیڑہ سے نا دنگ آ سلوک ءِ، تدوک آ منہ ہفتہ غاتیٹی، بے بنداو دوبہ غاتون اوار اوار بھارت نا کنڈآن اسہ کنڈی، سیاسی وڑاٹ محرک و بے کچ اشتعال انگیز گام گیج علاقائی و جہانی امن و سلامتی کن بھلو خطرہ ءُ، علاقائی بے چیٹی ءِ ودفنگ نا اسہ سجفوک ءُ کوشست اس کننگ انگ ءِ، اسہ مانوس وڑاسے آ عمل کرسا بیدس شاہدی آن پاکستان نا برخلاف کہولی دوبہ، اشتعال انگیز بیان بازی و جنگی جنون ءِ تہو ترسا اودے جارحیت و اسہ کنڈی کارروائی تا بہانہ نا وڑاٹ کاریم کننگ نا کوشست کننگ انگ ءِ۔
