اسلام آباد۔5مئی (اے پی پی): بنجاھی وزیر اھوالکاری ءُ شنگکاری عطا اللہ تارڑ ءَ گوشت کہ بھارت ءِ نیمگ ءَ پاکستان ءِ سر ءَ دروگیں بھتام جنگ ءِ رواج نوکیں گپے نہ اِنت۔ بھارت ءَ مدام مئے ھم وطن پاکستان ءِ نام ءِ ھراب کنگ ءِ ھاترا دروگیں الزام جوڑ کتگ اَنت۔ پاکستان ءَ ہر موہ ءِ سرا ذمہ واری، شفاف ءُ معروضی رنگ ءَ پسو داتگ۔ مرچی میڈیا ءَ را لائن آف کنٹرول ءِ ہما دمگاں تر ءُ تاب کنگ ءَ برگ بوتگ کہ آہانی بابت ءَ ہندوستان ءَ دروگیں وڑے ءَ ناشرکاری کیمپانی ھالیگیں پروپیگنڈا کتگ ات۔ لائن آف کنٹرول ءِ کش ءُ گور ءِ دراہیں رہائشی دمگاں زند نارمل اِنت۔ لائن آف کنٹرول ءِ تر ءُ تاب ءِ موہ ءَ مدویا ءَ گوں تران کنان ءَ عطا اللہ تارڑ ءَ گوشت کہ آزات کشمیر ءِ بلال نور شاہ ءُ پرام چیناسی دمگ آنی ھوالگ ءَ بھارتی الزام من گھڑت ءُ بے بن انت۔ ادا نہ ایوک ءَ دمگی آبادی یک نارملیں زند گوازینگ ءَ اِنت بلکیں ادا مزنیں وانگ ءُ زانگ ءِ ادارہ ھم ھست اَنت ءُ سیل ءُ سواد ھم ھما وڑ ءَ برجاہ اِنت۔ آئی ءَ گوشت کہ اے دمگ آنی تہ ءَ ناشرکاری ءِ ھچ وڑیں کیمپ نیست ءُ نہ کہ دگہ چست ءُ ایر انت کہ بھارت ایشی ءِ دعویٰ ءَ کنگ ءَ انت۔ بنجاھی وزیر انفارمیشن ءَ گوشت کہ 2019 ءَ پلواما ءِ وئیل ءَ پد ھم بھارت ءَ بالاکوٹ ءَ ھالیگیں ٹرین کیمپ آنی ڈرامہ جوڑ کتگ ات، ایشی ءِ پسو ءَ ما ٹھوس راستی ءُ شواہد آنی گوما داتگ ات۔ اے رندی ھم ھندوستان ءَ نقشہ ءِ بنیاد ءَ دروگیں پروپیگنڈا ءِ ٹکرے نبشتہ کتگ۔ ما رسانکدر ءَ را پدریں رنگے ءَ اے موہ داتگ کہ آ بیا اَنت ءُ وت بہ گند اَنت کہ اے الزام چنچو بے بن اَنت۔ عطا اللہ تارڑ ءَ گوشت کہ پاکستان ءَ ناشرکاری ءِ ھلاپ ءَ جنگ ءَ 90 ھزار ءَ چہ گیش جان ندر کتگ ءُ مرچی ھم مغربی سیمسر ءَ ناشرکاریں عناصر آنی ھلاپ ءَ زبردستیں آپریشن برجاہ انت۔ آئی ءَ گوشت کہ پاکستان یک زمہ واریں ریاست انت کہ آ امن ءِ لوٹ ءَ کنت بلے وتی ایمنی ءُ وت واجہی ءِ رکھینگ ءَ لاچار نہ انت ۔ آئی ئَ گوشت کہ پاکستان ئِ گور ئَ بھارت ئِ ناشرکاری ئِ تہ ئَ ھوار بوھگ ئِ ٹھوس ثبوت است انت۔ کلبھوشن جادھو یک زندگیں مثالے کہ آ پاکستان ءَ ناشرکاری ءِ کارانی تہا ھوار بوھگ ءِ سبب ءَ گپتگ ءُ دزگیر کنگ بوتگ۔ جعفر ایکسپریس اُرش ءَ پد ھندی رسانکدر ءَ نہ ایوک ءَ ناشرکاراں چہ فوٹیج زرتگ بلکیں وتی وشی ءِ درشان کنگ ءِ ھاترا شنگ ھم کتگ۔ بلے اے وئیل ملک ءِ راجدپتر ءِ ناشرکاری ءِ سنگین تریں وئیلاں چہ یکے بوتگ۔ آئی ءَ گوشت کہ پاکستان ءَ ناشرکاری ءِ واکیہ آنی پد ءَ بی ایل اے ءِ انٹرویو ءُ بیان ھندی چینل آنی سر ءَ شنگ کنگ بوتگ اے گپ ءِ ثبوت اِنت کہ اے عناصر ھندی سرپرستی ءَ رسگ ءَ اَنت۔ آئی ءَ گوشت کہ پہلگام ءِ وئیل کہ آئی ءَ گوں پاکستان ءَ ھچ سیادی نیست ات، جوڑ کنگ بوتگ ءُ پاکستان ءِ سر ءَ ایر کنگ بوتگ، اگاں چہ اے وئیل ءَ چہ بس دہ منٹ ءَ پد ایف آئی آر درج کنگ بوتگ ءُ انٹرنیشنل میڈیا ھم اے گپ ءَ پیش دارگ ءَ انت کہ پہلگام ءِ وئیل ءِ جعلی ویڈیو شنگ کنگ بوتگ انت۔ وزیر ءِ اھوالکاری ءَ گوشت کہ بھارت ءِ 9لکھ قبضہ گیریں اُرد بھارت ءِ ناجائزیں رنگ ءَ قبضہ کتگیں جموں ءُ کشمیر ءِ دمگ ءَ ھست اَنت ءُ آ ایوک ءَ کشمیری الس ءِ سر ءَ زلم ءُ زوراکی کنگ ءِ کوشست ءَ اَنت۔ پہلگام ءِ وئیل اصل ءَ ھندی سیکورٹی ادارہانی ناکامی اِنت۔ آئی ءَ گوشت کہ اے دروگیں پرچم آپریشن ءِ تہ ءَ پاکستان ءِ میار کنگ ءِ کوشست بے سوب بوتگ پرچا کہ پاکستان ءَ اے وئیل ءِ شفافیں پٹ ءُ پول ءِ وعدہ کتگ، اے گپ ءِ ثبوت انت کہ مئے دست ساپ انت۔ آئی ءَ گوشت کہ مئے امن ءِ واھشت ءَ را نزوری لیکگ مہ بیت، ما زانیں کہ چوں وت ءَ را رکھینگ بہ بیت۔ آئی ءَ گوشت کہ پلوامہ ءِ وئیل ءَ چہ پد وھدے بھارت ءَ اُرش کتگ گڑا ما ھندوستان ءِ دو بالی گراب ایر جتگ ءُ آھانی پائلٹ ھم دزگیر کتگ۔ اگاں ھندوستان پاکستان ءَ گوں ھوشیاریں چمے ءَ بہ چار ایت ما آئی ءَ انچیں زوراکیں رنگے ءَ پاکستان ءِ دیمپانی ءَ کنیں کہ ھندوستان ءِ نسل ءَ یات بیت۔ عطا اللہ تارڑ ءَ گوشت کہ بھارت نا ایوک ءَ دمگ ءَ بلکینگ ءَ سرجمیں دگنیا ءَ ناشرکاری ءِ واکیہ آنی تہ ءَ ھوار انت۔ امریکہ ءُ کینیڈا ءَ سکھ رہشونانی کوش ءِ منصوبہ بندی ءَ ہم ہندوستان ءِ کرد پدر بوتگ۔ پاکستان ءِ مزن وزیر ءَ تچک ءَ گشتگ کہ ہردیپ سنگھ نججر ءِ کوش ءَ ہندوستان ءِ دست مان انت۔ بنجاھی وزیر انفارمیشن ءَ اے گپ ءِ پدرائی کت کہ لائن آف کنٹرول ءِ سر ءَ درستیں دمگ امن ءُ ایمنی ءِ تہ ءَ اَنت ءُ اودا ناشرکاری ءِ ھچ وڑیں ھترہ ءُ ھچ وڑیں نا شریں کارروائی ءِ ھترہ نیست۔ ہندوستان ءِ پروپیگنڈا بس دنیا ءِ چماں مٹی ءِ شنگ کنگ ءِ جہد اِنت کہ آ دگہ سوبمند بوت نہ کنت۔
