اسلام آباد۔5مئی (اے پی پی): پاکستان ءَ جنوبی ایشیا ءِ دمگ ءَ نوکیں وئیل آنی بابت ءَ اقوام متحدہ ءِ سلامتی کونسل ءَ را رسمی رنگ ءَ سرپد کنگ ءِ پیسلہ کتگ۔ دو شمبے ءِ روچ ءَ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ پاکستان اقوام متحدہ ءِ سلامتی کونسل ءَ را اے بابت ءَ ھاسیں رنگ ءَ سرپد کنت کہ بھارت ءِ زوراکیں کارروائی، بار باریں آشوب ءُ اشتعال انگیز بیان چوں دمگی ءُ جھان ءِ امن ءُ ایمنی ءِ واستہ مزنیں ھترہ ءِ دیم ءَ کیت۔ پاکستان سندھ ءِ آپانی معاہدہ ءِ مھتل کنگ ءِ بھارت ءِ ناجائزیں ءُ یک نیمگی کوشست ءَ را ھم پدر کنت کہ اے آئی ءِ میاں اوستمانی ذمہ واری آنی ھاسیں ھلاپ ورزی اِنت۔ پاکستان اقوام متحدہ ءِ سلامتی کونسل ءَ چہ لوٹ کنت کہ آ اے دیمروئی آنی گیواری ءِ واستہ جوانیں گامگیج بہ زوریت ءُ میاں اوستمانی امن ءُ ایمنی ءِ واستہ وتی بنیاتی ذمہ واری ءَ پیلو بہ کنت۔
