اسلام آباد۔5مئی (اے پی پی): بنجاھی وزیر ءِ ھال ءُ اھوال عطا اللہ تارڑ ءَ میاں اوستمانی ءُ بنجاہی رسانکدر ءِ ھمراھی ءَ لائن آف کنٹرول ءِ ھما دمگ آنی تر ءُ تاب کتگ کہ بھارت ءَ باز رند ءَ پاکستان ءِ بنیات ءَ ناشرکاری ءِ پناہ گاہ ءِ جار جتگ۔ اے تر ءُ تاب ءِ مول ءُ مراد زمینی حقیقتانی وسیلگ ءَ بھارتی پروپیگنڈا ءِ پدر کنگ ات دانکہ دنیا وت بہ گندیت کہ بھارت ءِ نیمگ ءَ جتگیں الزام چنچو بے بن، من گھڑت ءُ گمراہ کنوک انت۔ تر ءُ تاب ءِ آسراتی وزارت ءِ اھوالکاری ءُ نشریات ءِ نیمگ ءَ چہ کنگ بوتگ۔ مدھیہ پردیش ءِ نمائندگاں ھما ھاسیں جاھاں برگ بوتگ کہ بھارت ءَ منظم ناشرکاری ءِ واستہ ایمنیں پناہ گاہ ءِ جار جتگ ات۔ زمینی راستی، ھندی آبادی ءِ گوہی ءُ جاور ھال آنی وت چار ءُ تپاسی کنان ءَ میڈیا ءَ اے بھارتی بیان آناں گواچنی رنگ ءَ پدر کنگ ءِ موہ در جت۔ اے موہ ءِ سر ءَ تران کنان ءَ بنجاھی وزیر اھوالکاری عطا اللہ تارڑ ءَ گوشت کہ بھارت ءَ باز رند ءَ پاکستان ءِ سر ءَ بے بنیں الزام جتگ بلے مرچی ما سرجمیں راستی میاں اوستمانی ءُ ملکی رسانکدر ءِ دیم ءَ ایر کتگ انت۔ ھما جاگہ کہ بھارت ءَ ناشرکاری کیمپ ءِ جار جتگ اَنت آ درور ءَ عام شہری آبادی ءِ دمگ اَنت۔ آئی ءَ گوشت کہ پاکستان یک زمہ واریں ریاست انت کہ آ نا ایوک ءَ دمگی بلکینگ ءَ جھان ءِ امن ءِ واستہ ھم پابند انت۔ عطا اللہ تارڑ ءَ گیش گوشت کہ پاکستان دگنیا ءِ کجام ھم دمگ ءَ ناشرکاری یا ناشرکاری چست ءُ ایر آنی مذمت ءَ کنت۔ ما وتی کارانی وسیلہ ءَ باز رند ءَ اے گپ ثابت کتگ کہ ما امن ءِ حمایت کنوک ایں، البت ما وتی حاکمیت ءِ دیمپانی ءِ ھاترا ہر حد ءَ روگ ءَ تیار ایں ۔ بنجاھی وزیر ءِ اھوالکاری ءَ گوشت کہ یک نیمگ ءَ بھارت پاکستان ءَ ملامت کنگ ءَ انت ءُ دومی نیمگ ءَ آ وت ناجائزیں رنگ ءَ جموں ءُ کشمیر ءِ سر ءَ قبضہ کنگ ءَ انت۔ آ انسانی حقانی سنگینیں لگتمالی ءِ کاراں گون اِنت۔ ہندوستان لائن آف کنٹرول ءِ سرا پروپیگنڈا وتی اندری ناکامیاں چیر دیگ ءِ ہاترا کارمرز کنت بلے مرچی میان استمانی رسانکدر ءَ اصل راستی وتی چماں گوں دیستگ۔ آئی ءَ گوشت کہ پاکستان ءَ یک رندے پد ءَ دگنیا ءَ را اے گپ پدر کتگ کہ آ دمگی امن ءِ واستہ جزم انت بلے ھندی ھرچ وڑیں زوراکی ءِ واستہ ترندی ءُ پیسلہ رنگ ءَ پسو دیگ بیت۔
