لاہور – 4مئی (اے پی پی): بھارت ءِ جنگی جنون ءُ پاکستان ءِ ھلاپ ءَ بیانیہ ءِ ھلاپ ءَ ریورنڈ ڈاکٹر مجید ایبل ءِ سروکی ءَ پاکستان ءِ نولاکھا پریسبائٹریئن چرچ ءِ دیم ءَ یک شمبے ءِ روچ ءَ پرامن زھرشانی جلسہ برجم دارگ بوت کہ ایشی ءِ تہ ءَ عیسائی کمیونٹی ءِ مزنیں کساسے ءَ بھر زرتگ۔ مظاہرہ ءِ مول ءُ مراد پاک فوج ءِ گوما یکوئی ءِ درشان کنگ ءُ ہندوستان ءِ دروگیں بیانیہ ءِ رد کنگ بوتگ۔ زھرشانی ءَ پیسر یک شمبے ءِ روچ ءَ نولاکھا پریسبائٹریئن چرچ ءَ پاکستان ءِ ایمنی، دیمروئی ءُ پاکستان ءِ سلاہ بندیں اُرد ءِ ھر دیم ءَ سوبمندی ءِ ھاترا ھاسیں دعا کنگ بوتگ۔ اے موہ ءِ سر ءَ عیسائی کمیونٹی ءَ دعا کت کہ پاکستان ہر محاذ ءَ سوبمند بہ بیت وھدیکہ پاکستانی فوج دژمن ءَ را لائکیں پسو دیگ ءِ واستہ مدام ھوشیار اِنت۔ ایشی ءَ پد شریکیں مردماں نوالکھا چرچ ءَ چہ لاہور پریس کلب ءُ پدا پنجاب اسمبلی ءَ ریلی ءِ شکل ءَ پرامن واک ءِ بندوبست کت۔ زھرشانی کنوکاں وتی دستاں جتا جتائیں بینر زرتگ اتنت کہ آھانی سر ءَ ”پاکستان زندگ بات“، ”پاک آرمی ءَ سلام“ ءُ ”ھندوستان ءِ دروگیں بیانیہ رد کنگ بوتگ“ ءِ نعرہ نبشتہ اتنت۔ اے موہ ءِ سر ءَ میڈیا ءَ گوں تران کنان ءَ ریورنڈ ڈاکٹر مجید ایبل ءَ گوشت کہ پاکستانی عیسائی کمیونٹی وتی قوت آنی گوما سیس ءِ دیوال ءِ وڑ ءَ اوشتاتگ۔ ہندوستان ءَ مدام پاکستان ءِ ھلاپ ءَ سازش ءُ دروگیں بیانیہ ءِ سرا زور داتگ بلے پاکستانی راج ھاسیں رنگ ءَ اقلیت وتی سرڈگار ءِ دفاع ءَ ھچ وڑیں قربانی دیگ ءَ چک ءُ پد نہ بنت۔ آئی ءَ گیش تران کت کہ بھارتی رسانکدر ءُ سرکاری ادارگ دگنیا ءَ را گمراہ کنگ ءِ کوشست ءَ کن اَنت بلے پاکستان ءَ توامیں مذھب ءُ سرجمیں راج پاکستانی لشکر ءِ سر ءَ سرجمیں بھروسہ ءُ شان ءِ درشان کن اَنت۔ مئے عبادت، دعا ءُ جزبگ درست پاک فوج ءِ گوما انت۔ پاکستان ءِ نولاکھا پریسبائٹریئن چرچ ءَ گوں سیادی داروکیں درستیں چرچاں اے پرجوشیں مظاہرہ ءَ بہر زرتگ۔
