لاہور۔4مئی (اے پی پی):شمبے ءِ شپ ءَ لیبیا ءَ بوجیگ ءِ ٹکر ءَ بیران بوتگیں دگہ دو پاکستانی ءِ لاش لاہور ءِ میان استمانی بالی پٹ ءَ آرگ بوتگ انت۔ بیران بوتگیں مردمانی سیادی ضلع گجرانوالہ ءَ چہ بوتگ ءُ آہانی پجار سفیان ءُ ندیم احمد ءِ نام ءَ بوتگ۔ لاش بالی پٹ ءِ کارگو ڈیپارٹمنٹ ءَ رسگ ءَ اتنت کہ اودا وفاقی وزیر مملکت برائے پبلک افیئرز رانا مباشیر حسین ءُ صوبائی اسمبلی پنجاب ءِ باسک میان عمران جاوید ءَ لاش وتی کھول ءِ دست ءَ داتگ انت۔ اے موہ ءِ سرءَ بیران بوتگیں مردمانی واستا دعا وانگ بوت ءُ پمیشکیں کھول ءِ گوما دلپدردی ءِ درشانی کنگ بوت۔ میڈیا ءَ گوں تران کنان ءَ رانا مبشیر حسین ءَ گشتگ کہ آماچیں ھاندان ءِ غم ءَ سرکار ھم شریک انت۔ آئی ءَ بوجیگ ءِ حادثہ ءَ را یک المی ئیں سانحہ لیک اِتگ ءُ گوشت کہ انسانی جان ءَ گوں گوازی کنوکیں مردمانی ھلاپ ءَ سکیں کانود جوڑ کنگ بوھگ ءَ اِنت۔ وفاقی وزیر ءَ گوشت کہ انسانی دزگیری ءَ گوں سیادی داروکیں لھتیں مردم دزگیر کنگ بوتگ اَنت وھدیکہ لھتیں آنی دزگیر کنگ ءِ واستہ آپریشن برجاہ اِنت۔ زانگ بہ بیت کہ اے غمناکیں وئیل 12 ءُ 13 اپریل ءِ شپ ءَ لیبیا ءِ رودراتکی کش ءُ گوراں بوتگ کہ ایشی ءِ تہ ءَ درجناں مردم بیران یا بیگواہ بوتگ اَنت۔
