اسلام آباد۔ 02 مئی (اے پی پی) نائب وزیراعظم و وزیرخارجہ سینیٹر محمد اسحاق ڈار جمعہ نادے آ ڈنمارک نا وزیرخارجہ لارس لو کے راسموسن تون ٹیل فون آ گپ وتران کرے۔ دفترخارجہ نا رداٹ نائب وزیراعظم وزیرخارجہ راسموسن ءِ بدل مروک آ علاقائی حالیت و بھارت نا بے بنداو دوبہ و اونا اسہ کنڈی و اشتعال انگیز گام گیج آتا ورندی ٹی پاکستان نا قومی سلامتی کمیٹی نا گام گیج آتیان معلومدار کرے۔ اوسندھ طاس معاہدہ ءِ التواء ٹی تخنگ نا بھارت نا فیصلہ ءِ سختی اٹ مسترد کرے ہرا معاہدہ نا دفعہ و جہانی کانود نا خلاف ورزی ءِ۔ نائب وزیراعظم گپ وتران اٹی علاقائی امن وسلامتی، تینا وتواجہی و قومی فائدہ غاتا رکھ اکن پاکستان نا کڑد و عزم انا ذکر ءِ کرے۔ وزیرخارجہ راسموسن بے چیٹی ٹی ودکی آ گڑتی نا درشانی ءِ کرسا ہڑتوم آ فریق آتا کنڈآن سگ انا درشانی ءِ کننگ نا اہمیت آ زور شاغا۔ ہڑتوم آ راہشونک اقوام متحدہ نا سلامتی کونسل نا بے آخبتی باسک انا حیثیت اٹ علاقائی و جہانی پیش رفت آتیا سلامتی کونسل اٹی خڑکی رابطہ ءِ برقرارتخنگ آ امنا کریر۔ اوہڑتوم آ کنڈآتا کمکاری ءِ سوگو کننگ خاص وڑاٹ زرگزران و زرکاری نا بشخ آتون اوار اوار بڑزکو کہول انا ہن وبر تے مون آ دننگ آہم امنا کریر۔
