اسلام آباد۔ 02 مئی (اے پی پی) وزیراعظم محمد شہباز شریف پاکستان ءِ بیدس شاہدی آن پہلگام واقعہ تون گنڈنگ نا ناپاک کوشست آتیٹی ہندوستان نا کنڈآن خلوک آ بے بنداو دوبہ غاتے پیدوار وڑاٹ مسترد کرساپارینے کہ پاکستان نا داواقعہ تون ہچ ءُ لینا دینا اس اف، پاکستان تینا دیکی پڑآن ودی مروک آ دہشت گردی نا عفریت تون مون تننگ ءِ، بھارت نا ساڑی آ گام گیج و اونا جارحانہ وڑانا مسخت پاکستان نا چکار ءِ دہشت گردی نا برخلاف کروک آ کوشست آتیان اسہ کنڈ کننگ ءِ۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہبا زشریف تون متحدہ عرب امارات(یواے ای ) نا سفیر حماد عبید ابراہیم الزعابی وزیراعظم ہاؤس اٹی اوڑدہی کرے۔ اوڑدہی ٹی وزیراعظم متحدہ عرب امارات نا صدر شیخ محمد بن زید النہیان کن نیک است خواہی نا درشانی ءِ کرے و پاکستان کن بدل مفروک مخ تفی آ متحدہ عرب امارات نا منت واری ءِ ہرفے ہرا ہڑتوم آملک آتا نیام اٹ تاریخی و ایلمی تعلقداری نا شاہدی ءِ۔ وزیراعظم پہلگام واقعہ غان پد سویلی ایشیاٹی ساڑی آ امن و ایمنی نا حالیت آتیا پاکستان نا نقطہ نظر آن معلومدار کرے۔ اوپارے کہ پاکستان دہشت گردی نا غٹ دروشم و مظاہر اٹی مذمتءِ کیک انتئے کہ او تینٹ دہشت گردی نا غٹ آن بھلا گواچی مسنے۔ تدوک آسال تیٹی 90,000مرک و 152 بلین امریکی ڈالر آن زیات نا زرگزرانی نسخان تا بابت بے پناہ قربانی تا حوالہ ءِ ترسا وزیراعظم پارے کہ پاکستان تینا دیکی پڑآن ودی مروک آ دہشت گردی تون مون تننگ ءِ، بھارت نا ساڑی آ گام گیج و اونا جارحانہ وڑانا مسخت پاکستان نا چکار ءِ دہشت گردی نا برخلاف کروک آ کوشست آتیان اسہ کنڈ کننگ ءِ۔ وزیراعظم بیدس شاہدی آن پہلگام واقعہ تون پاکستان ءِ گنڈنگ نا ناپاک کوشست آتیٹی ہندوستان نا کنڈآن خلوک آ بے بنداو دوبہ غاتے پیدوار وڑاٹ مسترد کرے۔ اوپارے کہ پاکستان نا داواقعہ تون ہچ ءُ تعلق اس اف و اوداہیت آ زور شاغا کہ داواقعہ نا پت انا قابل، شفاف و بے کنڈ ہلوک جہانی جاست وپاست نا گرج ءِ۔ اوپارے کہ پاکستان ساڑی تنکی آ تینا موقف ءِ پیش کننگ کن ایلو سنگت ملک آتون رابطہ کننگ ءِ ، داہیت آ زور شاغسا پارے کہ اونا حکومت نا چکار تدوک آ 15 تُو اٹی سخت خواری اٹ دوئی کروک آ زرگزرانی فائدہ غاتے سوگو کننگ آٹے ہرا متحدہ عرب امارات تون اوار سنگت ملک آتا مخ تفی آن ممکن مس۔ وزیراعظم پارے کہ پاکستان وخت اس ہم دُن ءُ گام اس کپک ہراڑآن علاقائی امن و سلامتی ءِ خطرہ مرے۔ دا چرجوئی ٹی وزیراعظم متحدہ عرب امارات تون اوار ایلم ملک آتیا زور شاغا کہ او ڈیہہ اٹی بے چیٹی ءِ کم کننگ کن ہندوستان ءِ مائل کیر۔ اوسویلی ایشاٹی امن وسوگوی کن پاکستان نا عزم انا درشانی ءِ کرے۔ متحدہ عرب امارات نا سفیر پاکستان نا موقف ءِ شیئرکننگ آ وزیراعظم نا منت واری ءِ ہرفے و پارے کہ متحدہ عرب امارات علاقائی امن و سلامتی کن پاکستان تون اواری اٹ کاریم کیک۔
