وزیرآباد۔ 02مئی (اے پی پی) مسکوہی وزیراعظم راجہ پرویز اشرف پارینے کہ بھارت ڈیہہ انا امن ءِ بگڑیفنگ نا ناپاک سازش کرینے۔ حکومت پاکستان پہلگام جلہو آ شفاف انکوائری نا مچ دنیا ءِ سلہ خلکنے و بھارتی مکروہ دروشم ءِ بے نقاب کرینے۔ بھارت منہ منٹ اٹی جلہو گیر آتا پن اسکان جاری کرے۔ بھارتی فالس فلیگ آپریشن نا حقیقت دنیا غا آشکار مسنے۔ اوداڑے پیپلزپارٹی پنجاب نا نائب صدر اعجاز احمد سماں نا ہنکین آ مرکزی راہشون پی پی سید حسن مرتضیٰ تون اوار صحافی تتون گپ وتران کریکہ ۔ راجہ پرویز اشرف پارے کہ سیالکوٹ پی پی 52ضمنی گچین کاری تیٹی پیپلزپارٹی گچین رزلٹ ایتک ۔ پنجاب اٹی تنظیمی پنجر ءِ سوگو کننگانے۔ اسہ سوج اسے نا ورندی ٹی اونا پاننگ ئس کہ پاکستان دنیا و ہمسایہ ملک آتون گچین تعلقداری نا خواہندار ءِ ولے جنگ انا دروشم اٹ بھارت ءِ ہندن ءُ ورندی اس ملک کہ دنیا یات تخک۔ جعفر ایکسپریس جلہو اٹی بھارتی شمولیت نا شاہدی ساڑی ءِ۔ اوپارے کہ مچ آدنیا ٹی اسہ ملک اس ہم جنگ خواپک۔ نن داوخت آ گچین خارجہ پالیسی اس تینا کرینن۔ جہانی دنیا ءِ پہلگام واقعہ نا حقیقت آن معلومدار کرینن۔ جنگ مسلط کننگا تو قوم سوگو ءُ دیوال اس جوڑ مریک۔ امتحان نا دروشم اٹی بھارت ءِ سخت ورندی تننگک۔ دہشت گردی نا برخلاف غٹ آن زیات قربانی پاکستان تسنے۔ حکومت قوم و پاکستان نا فوج یکجاءُ۔ داوخت آ سینئر راہشون پیپلزپارٹی چوہدری امتیاز صفدر وڑائچ،مختار احمد چیمہ، مسکوہی ایم پی اے تسنیم ناصرگجر، آصف بھاگٹ، محمد مشتاق گجر، طارق سلطان ، ذوالفقار میر تون اوار ایلوفک ہم ساڑی ئسر۔
