سرینگر۔ 02مئی (اے پی پی) بھارت نا غیرکانودی وڑاٹ کوزہ ٹی جموں وکشمیر اٹی سول سوسائٹی نا باسک آک بھارتی صحافی و بلاگرز انا کنڈآن کشمیری الس نا جوزہ غاتے مجروح کننگ نا سجفوک کوشست آ بھاز گڑتی نا درشانی ءِ کرینو۔ کشمیر میڈیا سروس نا رداٹ سول سوسائٹی نا باسک آک بشمول ڈاکٹر زبیر احمد راجہ، محمد فرقان ، محمد اقبال شاہین و سید حیدر حسین ئسک سرینگر اٹی اسہ دیوان اسے ٹی پاریر کہ بھارتی صحافی ، یوٹیوبر و بلاگرآک ہرافتے زیات تر بھارتی فوج، اودیم ایجنسی و بی جے پی حکومت نا سرپرستی دوئی ءِ، کشمیری تا جوزہ غاتا استحصال کننگ ءُ و حریت سرکڑدہ و پاکستان نا برخلاف بے بنداو پروپیگنڈاٹی اوار ءُ۔ اوفک پاریر کہ جانبدار بھارتی میڈیا کشمیری الس خاص کر ورناتے اشتعال ترفنگ ءُ و اوفتا جوزہ غاتے مجروح کننگ ءُ وخت اس کہ کشمیری دفعہ 370 و A35نا منسوخی و پہلگام فالس فلیگ آپریشن آن پد مقبوضہ علاقہ ٹی بھاز خوف و بھیم اٹی اختہ ءُ و اوفتے وحشیانہ ظلم و بیدادی و انسانی حق انا بھلا خلاف ورزی تا شست کننگ انگ ءِ۔ اوفک پاریر کہ مودی حکومت ہزار آ کشمیری تے بدترین انتقامی کارروائی تا شست کننگ کن زندان تیٹی بند کرینے۔ سول سوسائٹی نا باسک آک پاریر کہ ہندو توا آرایس ایس/بی جے پی نا ایجنڈاغا عمل کرسا بھارتی میڈیا کشمیری تا حق آ تالان جہد آجوئی ءِ بدنام کننگ نا ہرممکن کوشست کننگ ءُ۔
