اسلام آباد۔ 02 مئی (اے پی پی) وزیراعظم محمد شہباز شریف سعودی عرب تون اوار ایلم ملک آتیا زور شاغانے کہ او ڈیہہ اٹی بے چیٹی ٹی کمتی کن ہندوستان آ زور شاغر۔ جمعہ نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف تون سعودی عرب نا سفیر نواف بن سعید المالکی اوڑدہی کرے ہراٹی وزیراعظم خادم الحرمین الشریفین شاہ سلمان بن عبدالعزیز السعود و ولی عہد و وزیراعظم شہزادہ محمد بن سلمان بن عبدالعزیز السعود کن نیک است خواہی نا درشانی ءِ کرے۔ اوسعودی سرکڑدہ و الس نا منت واری ءِ ہرفے کہ او مدام پاکستان تون یکجہتی نا درشانی ءِ کریر۔ پہلگام واقعہ غان پد سویلی ایشیاٹی امن و ایمنی نا ساڑی حالیت آتیا پاکستان نا موقف ءِ بیان کرسا وزیراعظم پارے کہ پاکستان دہشت گردی نا غٹ دروشم و مظاہر نا مذمت ءِ کرینے۔ پاکستان تدوک آ سال تیٹی انسداد ءِ دہشت گردی نا کوشست آتیٹی بھلو قربانی تسنے ہراکہ نئے بیرہ پاکستان بلکن مچ آ دنیا نا رکھ اکن بے کچ اہم پک مسنے۔ اوبیدس شاہدی آن پہلگام واقعہ تون پاکستان ءِ گنڈنگ نا بے بنداو بھارتی دوبہ غاتے یکسر مسترد کرے و واقعہ نا شفاف و بے کنڈ ہلوک جہانی جاست وپاست نا تینا مطالبہ نا درشانی ءِ کرے۔ سعودی عرب تون اوار سنگت ملک آتا کمک اٹ تدوک آ 15 تُوانا خواری اٹ دوئی مروک آ زرگزرانی فائدہ غاتے سوگو کننگ آ حکومت نا پورو چکار ءِ تالان کرسا وزیراعظم پارے کہ پاکستان نا سرسہبی تے خطرہ ٹی شاغنگ و ملک ءِ اقتصادی شونداری نا کسر آن اسہ کنڈ کننگ نا بھارتی کوشست ناقابل فہم ءُ۔ اوسعودی عرب تون اوار ایلم ملک آتیا زور شاغا کہ او ڈیہہ اٹی بے چیٹی ٹی کمتی کن ہندوستان آ زور شاغر۔ اوسویلی ایشیاٹی امن و سوگوی کن پاکستان نا است خواہی نا درشانی ءِ کرے۔ سعودی سفیر دااہم باندات آ تینا خیال آتا درشانی ءِ کننگ آ وزیراعظم نا منت واری ءِ ہرفے و پارے کہ سعودی عرب ڈیہہ اٹی امن وسلامتی کن پاکستان تون اواری اٹ کاریم کننگ خواہک۔
