مظفرآباد۔ 02 مئی (اے پی پی) پاک بھارت بے چیٹی نا رداٹ وزیراعظم آزاد کشمیر چوہدری انوارالحق نا کماشی ٹی آل پارٹیز کشمیر کانفرنس مظفرآباد اٹی اڈ ہلک۔ کشمیر میڈیا سروس نا رداٹ کانفرنس اٹی سیاسی ومذہبی جماعت آتا نمائندہ غاک بشخ ہلکر و سلہہ بند فوج اتون پبی یکجہتی نا درشانی ءِ کننگا۔ کانفرنس اٹی بھارتی آبی جارحیت ءِ یکسر مسترد کننگا و بھارت ءِ گچین ورندی تننگ آ پاکستان نا حکومت و سلہہ بند فوج ءِ شاندار خراج تحسین پیش کننگا۔ کانفرنس اٹی بھارتی جنگی جنو ن ءِ مسترد و ایسر نا چاری کشمیر نا جھیڑہ ءِ جہانی کہول آ تالان کننگ نا پبی عزم انا درشانی ءِ کننگا۔ کانفرنس اٹی بشخ ہلوک آک جہانی برادری آ بھارت نا جنگی جنون نا دمدستی نوٹس ءِ ہلنگ آ زور شاغا رو کنٹرول لائن آ بھارت ہر جارحیت ءِ اونا آخیریکو غلطی گوندار۔ اوفک پاریر کہ بھارت مقبوضہ جموں وکشمیر اٹی فالس فلیگ آپریشن نا بہانہ ءِ کرسا کودک کشمیری تا کشت وخون ءِ برجاتخانے۔ بشخ ہلوک آک پاکستان نا سلامتی و رکھ کن ہروڑنا قربانی تننگ نا عزم انا درشانی ءِ کریر۔ کانفرنس اٹی بھارت نا فالس فلیگ آپریشن تے بے نقاب کننگ آ سلہہ بند فوج ءِ زبردست خراج تحسین پیش کننگا۔ سلہہ بند فوج اتون ہم کوپہ سلنگ نا عزم انا درشانیءِ کننگا۔ کانفرنس اٹی وزیراعظم آزاد کشمیر چوہدری انوارالحق، اپوزیشن لیڈر خواجہ فاروق، صدر مسلم لیگ شاہ غلام قادر، اسپیکر آزاد کشمیر کانود ساز اسمبلی چوہدری لطیف اکبر، چوہدری یاسین آن بیدس مسکوہی وزیراعظم سردار عتیق احمد خان، سردار یعقوب خان و سردار قیوم نیازی، سینئر وزیر وقار احمد نور، کنوینر آل پارٹیز حریت کانفرنس آزاد کشمیر شاخ غلام محمد صفی، حریت راہشون محمود احمد ساغر، شیخ عبدالمتین، پرویز احمد شاہ، صدر لبریشن لیگ منظور قادر ڈار ئسک ہم بشخ ہلکر۔ کانفرنس اٹی وزراء حکومت دیوان علی خان چغتائی، سردار عامر الطاف، میاں عبدالوحید، عبدالماجد خان، چوہدری اظہر صادق، پروفیسر تقدیس گیلانی و کشمیری حریت راہشون تتون اوار آزاد کشمیر نا سیاسی و مذہبی جماعت آتا نمائندہ غاک ہم بشخ ہلکر۔
