کوئٹہ۔ 02 مئی (اے پی پی) چیئرمین قائمہ کمیٹی دفاعی پیدوار سینیٹر محمد عبدالقادر تینا اسہ خصوصی ءُ بیان اسے ٹی پارینے کہ پہلگام واقعہ غان پد مچ آ دنیا پاکستان نا موقف نا تائید ءِ کرینے و پاکستان نا بارواٹی تروک آ بھارتی بیان تے دروغ انا پلندہ اس گوندانے، خالصتان تحریک نا راہشون گرپتونت سنگھ پنوں نا پاننگ ءِ کہ بھارتی پنجاب نا سیم پاکستانی پنجاب تون ملک، اگہ بھارت پاکستان آ جلہو کیک تو داجنگ بھارت و مودی نا آخیریکو جنگ جوڑ مریک، سکھ راہشون نا پاکستان نا مخ تفی ٹی تروک آ بیان پاکستان تون سکھ قوم انا سوگو تعلقداری نا ڈیک ءِ۔ چیئرمین قائمہ کمیٹی دفاعی پیدوار مستی پارے کہ پاکستان آ جلہو نا دروشم اٹی بھارتی پنجاب بھارتی کوزہ غان آجومریک و پوسکن ءُ آجو ملک اس مریک، بھارتی پنجاب پاکستان تون تمبہ نا حیثیت اٹ سلوک ءِ۔ سکھ راہشون تحریک خالصتان پارے کہ پاکستان اقوام متحدہ ٹی خالصتان ریفرنڈم نا تحریک ءِ شاغے و خالصتان نا مخ تفی نا پڑو ءِ کے۔ پاک بھارت جنگ انا دروشم اٹ پاکستان نا فوج انا مخ تفی ٹی سکھ بھارتی پنجاب اٹی لنگراس خلیرہ و پاکستان نا گلزادہ غاتا سیواءِ کیرہ۔ سکھ پاکستان تون ہم کوپہ مرسا بھارتی فوج انا مقابلہ ءِ کیرہ۔ مقبوضہ بھارتی پنجاب نا کینٹ ایریاٹی وال چاکنگ مننگ بناکرینے ، وال چاکنگ اٹی پاننگانے کہ سکھ پاکستان نا برخلاف جنگ کپس۔ پاکستان مدام تینا ہمسایہ ملک آتون بریبر و خوشگوار تعلقداری تا مون آ دننگ آ خاص چکارکرینے ولے اگہ بھارت پاکستان آ جنگ مسلط کرے تو پاکستان نا فوج بھارت نا پبی ورندی ءِ ایتک۔
