اسلام آباد۔2مئی (اے پی پی): مزن وزیر محمد شہباز شریف ءَ بھارت ءِ نیمگ ءَ چہ پاکستان ءَ را پہلگام ءِ وئیل ءَ گوں بے ھچ ثبوت ءَ ھمگرنچ کنگ ءِ نا شریں کوشست آنی تہ ءَ ایر کنگ بوتگیں بے بنیں الزام آناں گوں سدکی ءَ رد کتگ ءُ گوشتگ کہ پاکستان ءَ را اے وئیل ءَ گوں ھچ سیادی نیست۔ پاکستان وتی مغربی محاذ ءَ چہ درکپوکیں ناشرکاری ءِ ھترہ ءَ گوں دیم پہ دیم اِنت۔ بھارت ءِ انوگیں کار ءُ آئی ءِ زوراکیں رھبند ءِ مول ءُ مراد پاکستان ءِ دلگوش ءَ چہ ناشرکاری ءِ ھلاپ ءَ کنگ بوھوکیں کوشستاں چہ کشگ اِنت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ متحدہ عرب امارات ءِ سفیر حمد عبید ابراہیم الزعبی ءَ مزن وزیر گس ءَ مزن وزیر محمد شہباز شریف ءَ گوں گند ءُ نند کت۔ گند ءُ نند ءِ ساھت ءَ مزن وزیر ءَ متحدہ عرب امارات ءِ صدر شیخ محمد بن زاید النہیان ءِ نیکیں واھگ آنی درشان کت ءُ پاکستان ءِ واستہ بے دروریں کمک ءِ پد ءَ امارات ءِ شگر ءُ منت گپت کہ اے دوئیں ملک آنی نیام ءَ راجدپتری ءُ براتی سیادی آنی گواہ اِنت۔ مزن وزیر ءَ پہلگام ءِ واکیہ ءَ پد جنوبی ایشیا ءَ گوستگیں وھد ءَ امن ءُ ایمنی ءِ جاورھال ءِ ھوالگ ءَ پاکستان ءِ لیکہ آناں سر کت۔ آئی ءَ گوشت کہ پاکستان ناشرکاری ءِ ھمک رنگ ءُ دروشم ءَ مذمت کنت چیا کہ پاکستان وت ناشرکاری ءِ مستریں شکار بوتگ۔ گوستگیں سال آنی تہ ءَ 90 ہزار مردم آنی بیرانی ءُ 152ارب ڈالر ءَ چہ گیش ءِ اقتصادی تاوان ءِ رد ءَ کتگیں بے دروریں قربانی آنی حوالہ ءَ مزن وزیر ءَ گوشت کہ پاکستان وتی مغربی محاذ ءَ چہ دراتکگیں ناشرکاری ءِ ھترہ ءَ گوں دیم پہ دیم اِنت ءُ پاکستان ءِ ھلاپ ءَ بھارت ءِ انوگیں کار ءُ کرد ءُ پاکستان ءِ ھلاپ ءَ آئی ءِ زوراکیں رھبند ءِ رد ءَ دیم ءَ روگ ءَ اِنت۔ ناشرکاری ءِ سرا انت۔ مزن وزیر ءَ پاکستان ءَ را پہلگام ءِ وئیل ءَ گوں بے ھچ ثبوت ءَ ھمگرنچ کنگ ءِ نا شریں کوشست آنی تہ ءَ بھارت ءِ نیمگ ءَ ایر کنگ بوتگیں بے بنیں الزام آناں گوں سدکی ءَ رد کتگ۔ آئی ءَ گوشت کہ اے وئیل ءَ گوں پاکستان ءَ ھچ وڑیں سیادی نیست ءُ اے گپ ءِ سر ءَ زور پر دات کہ اے وئیل ءِ معتبر، شُھازگ ءُ غیر جانبداریں میاں اوستمانی پٹ ءُ پول ءِ ضلورت اِنت۔ آئی ءَ گوشت کہ پاکستان استیں بحران ءِ ھوالگ ءَ وتی موقف پیش کنگ ءِ واستہ ایندگر دوستیں ملک آناں دیم ءَ سر بوھگ ءَ اِنت، آئی ءَ اے گپ ءِ سر ءَ زور پر دات کہ آئی ءِ حکومت ءِ دلگوشی گوستگیں 15ماھ آنی محنت ءَ چہ زرتگیں اقتصادی سوبمندی آناں مھکم کنگ ءِ سر ءَ اِنت، ایشی ءَ را امارات ءَ ھوار دوستیں ملک آنی کمک ءَ چہ ممکن بوتگ۔ مزن وزیر ءَ گوشت کہ پاکستان کدی ھچ وڑیں گامگیج چست نہ کنت کہ ایشی ءَ چہ دمگی امن ءُ ایمنی ءَ را ھترہ بہ بیت۔ اے درگت ءَ مزن وزیر ءَ متحدہ عرب امارات ءَ ھوار براتیں ملک آناں زور پر دات کہ آ پڑ ءِ تہ ءَ کشیدگی ءَ را کم کنگ ءِ واستہ بھارت ءَ را دلجم بہ کن اَنت۔ آئی ءَ جنوبی ایشیا ءَ امن ءُ ایمنی ءِ برجائی ءِ واستہ پاکستان ءِ عزم ءِ یک رندے پدا گوشت۔ امارات ءِ سفیر ءَ پاکستان ءِ موقف ءِ شریک کنگ ءِ سر ءَ مزن وزیر ءِ شگر ءُ منت گپت ءُ گوشت کہ امارات دمگی امن ءُ ایمنی ءِ واستہ پاکستان ءِ گوما کار کنت۔
