وزیر ءِ درئی کار اسحاق ڈار ءَ جمہوریہ کوریا ءِ وزیر ءِ درئی کار چو تائی یول ءَ گوں ٹیلی فون ءِ سر ءَ گپ ءُ تران کنان ءَ مزن تک ءِ تبادلہ ءِ وسیلگ ءَ دو نیمگی سیادی آناں گیش مھکم کنگ ءِ سر ءَ تپاک

اسلام آباد۔1مئی  (اے پی پی): پاکستان ءُ جنوبی کوریا ءِ درئی کار ءِ وزیر آنی نیام ءَ مزن تک ءِ تبادلہ ءِ وسیلگ ءَ چہ وت مہ وتی سیادی ءَ را گیش مھکم کنگ ءِ تپاک کتگ۔ درئی کارانی کارگس ءِ نیمگ ءَ چہ جاڑی بوتگیں بیان ءِ رد ءَ درئی کارانی وزیر اسحاق دار ءَ پنچ شمبے ءِ روچ ءَ وتی جمہوریہ کوریا ءِ ھمکار چو تائی یول ءَ گوں فون ءِ سر ءَ گپ ءُ تران کتگ۔ آئی ءَ آھاں ھندوستان ءِ بے بنیں پروپیگنڈا ءُ یک نیمگی کارروائی آنی سبب ءَ پیداکیں دمگی جاور ھال آنی بابت ءَ سرپد کت، ایشی ءِ تہ ءَ سندھ ءِ آپانی معاہدے ءِ مھتل کنگ ھم ھوار اِنت۔ وزیر ءِ درئی کار چو تائی یول ءَ جاور ھال آنی سر ءَ جیڈھ ءِ درشان کنان ءَ دمگی امن ءُ ایمنی ءِ برجائی ءِ واستہ گپ ءُ تران ءُ سفارتکاری ءِ وسیلگ ءَ جیڈھ آناں گیواری ءِ ارزشت ءِ سر ءَ زور پر دات۔ اقوام متحدہ ءِ سلامتی کونسل ءِ غیر دائمی باسک ءِ بستار ءَ دوئیں رہشوناں کثیر جہتی کمک ءَ را مھکم کنگ ءِ واستہ وتی جزم ءِ دوبر پدر کت۔ وزیر ءِ درئی کار چو تائی یول ءَ گوستگیں ماہ ءَ اسلام آباد ءَ اقوام متحدہ ءِ امن مشن ءِ سیمی وزارتی تیاری دیوان ءِ سوبمندیں میزبانی ءَ را ساڑات۔ ایشاں مزن تک ءِ تبادلہ ءِ وسیلگ ءَ دو نیمگی سیادی ءَ را گیش مھکم کنگ ءِ سر ءَ ھم تپاک کتگ۔