اسلام آباد۔1مئی (اے پی پی): مزن وزیر محمد شہباز شریف ءَ صدر آصف علی زرداری ءَ گوں صدارتی ایوان ءَ گند ءُ نند کتگ ءُ پہلگام ءِ اُرش ءَ پد بھارت ءِ گوما کش ءُ چیل ءِ رد ءَ استیں ایمنی ءِ جاور ھال آنی سر ءَ گپ ءُ تران کتگ۔ پنچ شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءَ نائب مزن وزیر ءُ دری کارانی وزیر سینیٹر محمد اسحاق دار ءُ وزیر کانود ءُ انصاف سینیٹر اعظم نظیر تارڑ ھم گند ءُ نند ءَ ساڑی بوتگ انت۔ گند ءُ نند ءَ پہلگام ءِ اُرش ءَ پد بھارت ءِ گوما کش ءُ چیل ءِ رد ءَ استیں سیکورٹی جاور آنی سر ءَ ھیال ریچی کنگ بوت۔ دوئیں رہشوناں بھارت ءِ زوراکیں رویہ ءُ اشتعال انگیز بیان آنی سر ءَ سک باز جیڈھ ءِ درشانی کتگ۔ بیان ءِ تہ ءَ گوشت کہ بھارتی رویہ دمگی امن ءُ ایمنی ءَ را ھترہ ءِ آماچ کنت، پاکستان ملک ءِ سرزمین یکوئی ءُ وت واجہی ءِ سر ءَ ھچبر سمجھوتہ نہ کنت۔ اعلامیہ ءِ تہا گشگ بوتگ کہ پاکستان ہر وڑیں زوراکی ءِ لائکیں پسو ءَ دنت۔ پاکستانی راج تپاک اِنت ءُ گوں وتی سلاہ بندیں لشکر ءَ اوشتاتگ۔ بیان ءِ تہ ءَ گیش گوشت کہ پاکستان ءِ سلاہ بندیں اُرد ھرچ وڑیں ھترہ ءُ زوراکی ءِ سر ءَ جوانیں پسو دیگ ءِ توان ءَ دار اَنت۔ گند ءُ نند ءَ بھارت ءِ زوراکی ءِ رویہ ءُ ھرچ وڑیں ممکنہ زوراکی ءِ ھلاپ ءَ پاکستان ءِ پسو ءِ سر ءَ ھم چار ءُ تپاسی کنگ بوت۔ گند ءُ نند ءَ پہلگام ءِ ارش ءِ ھوالگ ءَ بھارتی سروکی ءِ نیمگ ءَ ھچ وڑیں پٹ ءُ پول ءَ ابید جتگیں الزام آنی سر ءَ اپسوز ءِ درشان کنگ بوت۔ بیان ءِ تہ ءَ گوشگ بوت کہ پاکستان دو دہائی ءَ چہ ناشرکاری ءِ آماچ اِنت ایشی ءَ را بے دروریں انسانی ءُ معاشی تاوان ءِ آماچ اِنت۔ میاں اوستمانی براتی ءَ را ناشرکاری ءِ کارانی واستہ پاکستان ءَ جنگولانی فنڈنگ، ٹریننگ ءُ روان دیگ ءِ تہ ءَ بھارت ءِ ھوار بوھگ ءِ نوٹس کنگی اِنت۔ صدر ءِ مملکت ءَ بھارت ءِ بے بنیں الزام آنی سر ءَ حکومت ءِ پسو ءُ جاور ھال آناں ذمہ واری ءِ رنگ ءَ دیم ءَ برگ ءِ ساڑات۔ صدر ءِ مملکت ءَ گوشت کہ پاکستان وتی وت واجہی، علاقائی یکوئی ءُ ھاسیں راجی پائدگ آنی رکھینگ ءِ واستہ ھمک قیمت ءَ ھمک رنگ ءَ گامگیج چست کنت۔ گند ءُ نند ءَ کشمیری الس ءِ وت واجئی ءِ حق ءِ واستہ سلامتی کونسل ءِ قرارداد آنی سر ءَ عمل کنگ ءِ زوتیں ضلورت ءِ سر ءَ ھم زور پر دات۔ مزن وزیر ءَ صدر ءِ مملکت ءَ کوویڈ 19 ءَ چہ وش بوھگ ءَ پد آئی ءِ جان سلامتی ءِ ھوالگ ءَ ھم جست ءُ پرس کت۔
