اسلام آباد۔1مئی (اے پی پی):انسانی حقانی وفاقی پارلیمانی سیکرٹری صبا صادق ءَ گشتگ کہ حکومت کارکنانی وشحالی ءِ ھاتر ءَ ہر ممکن گامگیج کنگ ءَ انت۔ آئی ءَ اے عزم ءِ پدا زور دات کہ استیں حکومت مزدور تبک ءِ وشھالی ءِ واستہ ھرچ وڑیں گامگیج چست کنت۔ مزدور آنی میاں اوستمانی روچ ءِ موہ ءَ وتی کلوہ ءِ تہ ءَ آئی ءَ گوشت کہ مزدور آنی واستہ کم چہ کم اجرت ءِ قانون ءِ سر ءَ عمل کنگ ءِ واستہ ھمک رنگ ءِ گامگیج کنگ بوھگ ءَ انت۔ آئی ءَ گوشت کہ ترندیں، ھواریں ءُ برجمیں دیمروئی ءِ مول ءُ مراد ایوک ءَ یک محنتی، سرمچار ءُ جزمیں کارکن آنی کوشست آنی وسیلگ ءَ سرجم کنگ بوت کنت۔ آئی ءَ گوشت کہ وفاقی حکومت صوبائی حکومت آنی گوما کمک ءَ مزدور ءُ آوانی کھول آنی وشھالی ءِ واستہ ھمک رنگ ءِ گامگیج کنگ ءُ آوانی زندمان ءِ تک ءُ پھنات ءَ را برز کنگ ءِ واستہ سرجمیں رنگ ءَ جزم انت۔ آئی ءَ گوشت کہ ما سک شری ءَ سرپد ایں کہ ایوک ءَ یک جان سلامت، وشھالیں، وانندہ ءُ جوانیں کار ءِ توان پاکستان ءَ را وتی سرجمیں چاگردی ءُ اقتصادی گنجائش آناں پیلو کنگ ءِ اہل جوڑ کت کنت ءُ اے ھما چیز اِنت کہ ما سرجمیں مخلصی ءُ مول ءُ مراد ءِ گوما کار کنگ ءَ ایں ۔ آئی ءَ زالبولاں ہوار محنتی مزدور آنی محنت ءَ را شگر ءُ منت درشان کت ءُ گوشت کہ ایشانی سبب ءَ معیشت دیم ءَ روگ ءَ انت۔ آئی ءَ گوشت کہ ایمن ءُ جان سلامتی ءِ کار ءِ چاگرد ءَ را دل یکیمی کنگ ءِ ھوار کارکن آنی واستہ جوانیں تربیت ءِ ضمانت ءِ واستہ اصلاحات کنگ بوھگ ءَ انت۔ صبا صادق ءَ گوشت کہ حکومت ورنا آناں جتا جتائیں ھنر آنی تہ ءَ تربیت دیگ ءَ انت ءُ آوانی سرٹیفیکیشن ءَ را دل یکیمی کنگ ءَ انت تانکہ درملک ءَ روزگار ءِ موہ آنی رسگ ءِ موہ گیش بہ بنت۔ آئی ءَ کارکن آنی ھک آنی رکھینگ ءُ آھاں گیش ءَ چہ گیش آسراتی آنی پھجارینگ ءِ واستہ حکومت ءِ عزم ءِ پدا زور دات۔
