اسلام آباد۔30اپریل (اے پی پی):مزن وزیر محمد شہباز شریف ءَ بھارت ءِ گیش بوھوکیں جنگ ءُ چوپی رویہ ءَ را سک باز نا اُمیت ءُ پریشان کنوک لیکگ ءِ وھد ءَ امریکہ ءَ را زور پر داتگ کہ آ بھارت ءِ سر ءَ زور پر بہ دنت کہ آ اشتعال انگیز بیاناں چہ دست بہ جنت ءُ ذمہ واری ءِ گوما کار بہ کنت۔ سندھ ءِ آپانی معاہدہ ءَ ہچ وڑیں فریق ءِ نیمگ ءَ یک نیمگی کشگ ءِ ہچ وڑیں ہک نیست۔ جموں ءُ کشمیر ءِ جیڈھ ءِ پرامنیں گیواری جنوبی ایشیا ءَ دائمی امن ءِ ھاترا یکیں راہ اِنت۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ امریکی وزیر ءِ درئی کار مارکو روبیو ءَ مزن وزیر محمد شہباز شریف ءَ گوں فون کتگ۔ مزن وزیر ءَ امریکی وزیر ءِ درئی کار ءَ گوں گپ ءُ تران کنان ءَ امریکی صدر ڈونلڈ ٹرمپ ءِ واستہ نیکیں واھشت آنی درشان کت ءُ پاکستان ءِ واھشت ءِ درشان کت کہ آ امریکی انتظامیہ ءِ گوما وت مہ وتی نپ ءِ توامیں پڑ آنی سر ءَ کار بہ کنت۔ مزن وزیر ءَ پہلگام ءِ وئیل ءَ پد جنوبی ایشیا ءَ نوکیں دیمروئی آنی ھوالگ ءَ پاکستان ءِ لیکہ ءِ بابت ءَ امریکی وزیر ءِ درئی کار مارکو روبیو ءَ را سرپد کت۔ مزن وزیر ءَ ناشرکاری ءِ ھمک رنگ ءِ مذمت کنان ءَ مزن وزیر ءَ ناشرکاری ءِ ھلاپ ءَ جنگ ءَ پاکستان ءِ ھاسیں کرد ءِ ذکر کت ءُ گوشت کہ پاکستان ءَ ناشرکاری ءِ ھلاپ ءَ جہانی جنگ ءَ 90 ہزار ءَ چہ گیش مردم آنی جان قربان کتگ ءُ پاکستان ءَ را 152ارب ڈالر ءَ چہ گیش معاشی تاوان برداشت کنگی بوتگ۔ مزن وزیر ءَ بھارت ءِ گیش بوھوکیں جنگ ءُ چوپی رویہ ءَ را سک باز مایوس کنوکیں ءُ پریشان کنوک لیکگ ءَ گوشت کہ بھارت ءِ اشتعال انگیز رویہ پاکستان ءِ ناشرکاری ءَ را ھلاس کنگ ءِ جاری کوشست آنی نیمگ ءَ چہ دلگوشی ءَ را کشگ ءَ اِنت ھاسیں رنگ ءَ آئی ایس کے پی، ٹی ٹی پی ءُ بی ایل اے ءَ ھوار جنگول گل آناں کہ اوگانستان ءَ چہ کار کنگ ءَ اَنت۔ آئی ءَ پاکستان ءَ را پہلگام ءِ وئیل ءَ گوں بندوک کنگ ءِ بھارتی کوشست آناں گوں سدکی ءَ رد کت ءُ راستی آناں در کنگ ءِ ھاترا شفاف، معتبر ءُ غیر جانبداریں پٹ ءُ پول ءِ لوٹ ءِ پدا زور دات۔ آئی ءَ امریکہ ءَ را زور پر دات کہ آ بھارت ءَ را زور پر بہ دنت کہ آ اے وڑیں اشتعال انگیز بیاناں چہ دست بہ جنت ءُ ذمہ واری ءِ گوما کار بہ کنت۔ آئی ءَ گوشت کہ اے گپ سک باز افسوس ءِ گپ اِنت کہ بھارت ءَ پاکستان ءِ ھلاپ ءَ آپی زوراکی ءِ گچین کتگ کہ پاکستان ءِ 240ملین مردم آنی زندمان ءِ راہ اِنت؛ مزن وزیر ءَ اے گپ ءِ سر ءَ ھم زور پر دات کہ سندھ ءِ آپانی معاہدہ ءِ تہ ءَ ھچ وڑیں شق نیست کہ کجام ھم فریق یک نیمگی ءَ چہ در بہ کپ ایت۔ مزن وزیر ءَ اے گپ ءِ سر ءَ زور پر دات کہ جموں کشمیر ءِ جیڈھ ءِ پرامنیں رنگ ءَ گیواری جنوبی ایشیا ءَ دائمی امن ءَ را دل یکیمی کنگ ءِ یکیں راہ اِنت۔ پاک امریکہ ءِ دو نیمگی کمک ءِ ھوالگ ءَ مزن وزیر ءَ اے گپ ءِ سر ءَ زور پر دات کہ پاکستان ءُ امریکہ ءَ گوستگیں 70سال آنی تہ ءَ یکجائی ءَ کار کتگ ءُ دوئیں نیمگ ناشرکاری ءِ ھلاپ ءَ جنگ ءُ اقتصادی کمک ءَ را گیش کنگ ءَ ھوار بازیں شوبگ آنی تہ ءَ گیش کمک کت کن اَنت ایشی ءِ تہ ءَ معدنیات ءِ شوبگ ھم ھوار اِنت۔ مزن وزیر ءَ گوشت کہ منی حکومت ءَ گوستگیں سال ءِ تہ ءَ مزنیں اقتصادی اصلاحات کتگ ایشی ءِ آسر ءَ پاکستان نوں اقتصادی برجائی ءِ کشک ءَ رھادگ اِنت۔ امریکی وزیر ءِ درئی کار مارکو روبیو ءَ سرجمیں گپ ءُ تران ءِ سر ءَ مزن وزیر ءِ منت گپت ءُ جنوبی ایشیا ءَ امن ءُ ایمنی ءِ واستہ دوئیں نیمگ ءَ یکجائی ءَ کار کنگ ءِ ضلورت ءِ سر ءَ زور پر دات۔
