اسلام آباد۔ 30 اپریل (اے پی پی)بنجائی وزیر انفارمیشن ٹیکنالوجی و ٹیلی کمیونیکیشن شزہ فاطمہ خواجہ و ڈیجیٹل کمکار تنظیم نا سیکرٹری جنرل دیما الیحییٰ پاکستان اٹی ڈیجیٹل ٹرانسفارمیشن ءِ پک کننگ نا عزم انا درشانی ءِ کرسا پارے کہ داڑآن ملک اٹی شونداری، شونہالی ، زرکاری ، روزگار و شفافیت نا پوسکن آ دور بناکیک۔ داخیال آتا درشانی ءِ او چارشنبے نادے آ ڈیجیٹل ڈائریکٹ انویسٹمنٹ فورم نا ایسری آ پریس کانفرنس آن تران کرساکرے۔ بنجائی وزیر آئی ٹی شزہ فاطمہ خواجہ پارے کہ وزیراعظم شہباز شریف تدوک آدے دافورم نا بنائی دود اٹی بشخ ہلک۔ وزارت آئی ٹی وزیراعظم محمد شہباز شریف نا وژن نا رداٹ ملک اٹی نیشنل ڈیجیٹل ٹرانسفارمیشن کن کوشست کننگ ءِ ، حکومت نا پامدارگام گیج آتا سوب آن آئی ٹی برآمد آتیٹی 25 درسد ودکی مسنے۔ اوپارے کہ دا فورم اٹی شریدار آتون اواری اٹ پاکستان اٹ زرکاری اتنگ نا کوشست ءِ۔ فورم اٹی بشخ ہلوک آک پاکستان اٹی 700 ملین ڈالر نا لگ بھگ زرکاری نا قول کرینو۔ ڈیجیٹل کمکار تنظیم نا سیکرٹری جنرل دیما الیحییٰ پاکستان اٹ ڈیجیٹلائزیشن کن ہرممکن کمک فراوان کرینے، دا فورم اٹی 30 آن زیات وزیر و ڈل بشخ ہلکنو، 100 آن زیات آئی ٹی کمپنی تا سی ای اوک بشخ ہلکر، 400 آن زیات ملکی کمپنیک داٹی بشخ ہلکر، 70 آن زیات ملکی و جہانی زرکارآک بشخ ہلکر۔ اوپارے کہ دافورم ءِ سرسہب کننگ کن کمکاری آ وزارت آئی ٹی، پاکستان سافٹ ویئر ایکسپورٹ بورڈ و ایلوشریدار آتا منت وار اُن۔ داوخت آ گپ وتران کرسا ڈیجیٹل کمکار تنظیم نا سیکرٹری جنرل دیما الیحییٰ پارے کہ دا سرسہب فورم نا اڈتننگ آ پاکستان ءِ مبارکباد پیش کینہ، پاکستان ڈیجیٹل ایف ڈی آئی نا چیمپئن ءِ، پاکستان نا زرگزرانی شونداری ٹی آئی ٹی نا بشخ انا اہم ءُ کڑ داسے۔ اوپارے کہ نن گام گیج آتے عملی دروشم اس تننگ کن کوشست کننگ اُن، بروک آ سال اسلام آباد اٹی ولدا کانفرنس مریک، اوٹی پوسکن ءُ پیش رفت اس مریک۔ وزیراعظم محمد شہباز شریف و بنجائی وزیر آئی ٹی شزہ فاطمہ خواجہ نا وژن شونداری ہی اسٹ انگا کسر ءِ ہراڑکن ملک اٹی ڈیجیٹل انقلاب اس اتنگ المی ءِ۔ اوپارے کہ پاکستان کنا ارٹ میکو اُرا ءِ ، پاکستانی الس نا شونداری و شونہالی مشن ءِ۔
