اسلام آباد۔ 30 اپریل (اے پی پی) وزیراعظم محمد شہباز شریف ڈیجیٹل انوسٹمنٹ فورم اٹی آئی ٹی نا بشخ اٹی جم وڑاٹ 70 کروڑ ڈالر نا زرکاری نا ستاءِ کرسا پارینے کہ پاکستانی قوم نئے بیرہ ملکی بلکن جہانی زرگزران نا شونداری ٹی مرکزی کڑد ادا کننگ نا لائخی ساڑی ءِ، حکومت آئی ٹی و ایلو بشخ آتیٹی اصلاحات نا عمل اٹی پاکستانی زرکاربرادری ءِ اوار کننگ ءِ اولیت ایتک۔ چارشنبے نادے آ وزیراعظم میڈیا آفس آن جاری بیان نا رداٹ وزیراعظم محمد شہباز شریف نا کماشی ٹی ایف بی آر اٹی ڈیجیٹل و ایلو اصلاحات نا عمل اٹی زرکارآتا اوار مننگ و وارخواہی تا بابت دیوان اس مس۔ دیوان اٹی وزیرخزانہ محمد اورنگزیب، وزیر آئی ٹی شزافاطمہ خواجہ، سیکرٹری جنرل ڈیجیٹل کوآپریشن آرگنائزیشن دیمہ الیحییٰ ، جہانی آئی ٹی کمپنی تا سی ای او و تعلقدار ادارہ غاتا آفیسر آک بشخ ہلکر۔ وزیراعظم ڈیجیٹل کوآپریشن کانفرنس نا رداٹ مروک آ ڈیجیٹل انوسٹمنٹ فورم اٹی پاکستان نا آئی ٹی بشخ اٹی جم وڑاٹ 70 کروڑ ڈالر نا زرکاری نا ستاءِ کرے۔ وزیراعظم پارے کہ جہانی کہول آ پاکستانی کاروباری برادری تینے منفنگ ءُ، آئی ٹی نا بشخ اٹی پاکستانی کاروباری بندغ آک جہانی مارکیٹ اٹی قابل قدر خذمت پیش کننگ ءُ، داہیت اٹی ہچ ءُ شک اس اف کہ پاکستانی قوم اٹی نئے بیرہ ملکی بلکن جہانی زرگزران نا شونداری ٹی مرکزی کڑد ادا کننگ نا لائخی ساڑی ءِ۔ وزیراعظم پارے کہ پاکستان اٹی آئی ٹی تون اوار ہر بشخ اٹی دنیا نا گچین چاہندار ساڑی ارے اگہ اوفتے کچ و لائخی تا رداٹ موقع تننگے تو او گچین نتیجہ تننگ کیرہ، حکومت ملکی آئی ٹی و ایلو بشخ آتیٹی اصلاحات نا عمل اٹی پاکستانی زرکاربرادری ءِ اوار کننگ ءِ اولیت ایتک، پاکستانی زرکارنا کمک اٹ ننے دیرپا، گچین و پائیدار نتیجہ دوئی مریک۔ وزیراعظم آئی ٹی نا بشخ انا زرکارآتے ایف بی آر اٹی ڈیجیٹل اصلاحات اٹی زرکاری نا وارخواہی تیان معلومدار کننگ کن خصوصی ویبینار اڈتننگ نا پارت کرے۔ دیوان اٹی بشخ ہلوک آتے ایف بی آر اٹی ڈیجیٹل اصلاحات نا عمل نا چندی ریسہ و اوٹی ساڑی زرکاری نا وارخواہی تیان معلومدار کننگا۔ دیوان ءِ پاننگاکہ ایف بی آر اٹی ڈیجیٹل مانیٹرنگ، ٹریک اینڈ ٹریس ، ڈیجیٹل پٹ وپول و جاچ و ایلو اصلاحات آتیا کاریم کننگ انگ ءِ ہرافتیان چندی نافذ العمل مسنو۔ ایف بی آر اٹی ڈیجیٹل انوائسنگ، فیس لیس ٹیکنالوجی، کارگوٹریکنگ و ایلو ڈیجیٹل اصلاحات اٹی جم وڑاٹ 10 کروڑ ڈالر آن زیات نا زرکاری نا وارخواہی ساڑی ءِ۔
