رباط۔ 30 اپریل (اے پی پی) چیئرمین سینیٹ پاکستان سید یوسف رضاگیلانی پارینے کہ پاک قطر تعلقداری مذہبی، دودوربیدہ ئی و تاریخی رشتہ غاتیا تالان ءُ، آئی ٹی، فارماسیوٹیکل، تعمیرات، شپنگ و سمندری بشخ آتیٹی تین پہ تینی کمکاری نا بھلو گنجائشت اس ساڑی ءِ ، غزہ ٹی جنگ بندی و بندی تا رہائی نا کوشست آتیٹی قطر انا ثالثی ستاکڑزک۔ چارشنبے نادے آ سینیٹ سیکرٹریٹ آن جاری بیان نا رداٹ داخیال آتا درشانی ءِ او مراکش اٹی شوریٰ کونسل قطر انا ڈپٹی اسپیکر ڈاکٹر حمدہ بنت حسن السلیطی تون اوڑدہی ٹی گپ وتران کرساکرے۔ چیئرمین سینیٹ پارے کہ پاکستان قطر اتون تینا ایلمی و خوشگوار تعلقداری تے بھاز قدر انا نظر اٹ ہرک۔ پاک قطر تعلقداری مذہبی، دودوربیدہ ئی و تاریخی رشتہ غاتیا تالان ءُ۔ پاکستان و قطر انا نیام اٹ پارلیمانی، واپاری و زرگزرانی تعلقداری سوگو بنداوتیا جوڑ ءُ۔ اوپارے کہ پاکستان و قطر انا الس نا نیام اٹ مریس مدی خڑکی رابطہ جوڑ ءِ۔ وزیراعظم محمد شہبازشریف امیر قطر شیخ تمیم بن حمد آل ثانی نا سلہ غا تدوک آ سال دورہ ءِ کرے۔ دادورہ غان ہڑتوم آکنڈآتا تعلقداری پین سوگو مس و چندی بشخ آتیٹی کمکاری نا وارخواہی تے مون آدننگ آ زور شاغنگا۔ داوخت آ چیئرمین سینیٹ قطر انا امیر نا دورہ ءِ پاکستان اٹی بھاز است خواہی نادرشانی ءِ کرے۔ پاکستان قطر ءِ ڈیہہ اٹی تینا اہم انگا شریدار و خڑکی سنگت تکک۔ اوپارے کہ پاکستان غٹ بشخ آتیٹی قطر اتون تعلقداری تے پین مون آ دننگ کن سنبرینگوک ءِ۔ چیئرمین سینیٹ نا کنڈآن شیخہ المیاسہ بنت حماد آل ثانی نا پاکستان اٹی اڈ ہلوک ’’منظر‘‘ نمائش نا ستاءِ کرے۔ اوپارے کہ قطر چیریٹی ، قطر فنڈ فار ڈیولپمنٹ و ایجوکیشن ابووآل کون آ ڈٹ آتیٹی قطر انا کڑد، ہڑتوم آملک آتا نیام اٹ خڑکی نا شاہدی ءِ۔ ہڑتوم آکنڈآتا کمکاری ءِ منظم و گچین کننگ کن پارلیمانی کہول آ باقاعدہ رابطہ بے کچ المی ءِ۔ پاکستان و قطر انا نیام اٹ پارلیمانی رابطہ غاتے پین سوگو کننگ کن ودکی مفاہمتی یات داشت نا معاہدہ المی ءِ۔
