اسلام آباد۔ 30 اپریل (اے پی پی) بنجائی وزیر جان جوڑی سید مصطفیٰ کمال پارینے کہ پاکستان، چین اتون نجی بشخ انا شریداری اٹ دوائی جوڑ کننگ اٹ ٹیکنالوجی نا گدریفنگ نا خواہندار ءِ، پاکستان اٹی پرائمری و ٹریژی ہیلتھ کیئر نا نیام اٹ خورکی ءِ کم کننگ کن ٹیلی میڈیسن نا مون آدننگ المی ءِ، دا بشخ اٹی چین نا آزموندہ غاتیان پبی فائدہ ہرفنگ انگ ءِ۔ چارشنبے نادے آ وزارت جان جوڑی آن جاری بیان نا رداٹ داخیال آتا درشانی ءِ او شنگھائی کمکار تنظیم نا ہیلتھ کانفرنس اٹی چین نا وزیر جان جوڑی تون اوڑدہی ٹی گپ وتران اٹی کرے۔ اوڑدہی ٹی ہڑتوم آملک آتا نیام اٹ جان جوڑی نا بشخ اٹی کمکاری ءِ مون آ دننگ، ٹیکنالوجی ءِ گدریفنگ و زرکاری نا گیشتر گمان تیا گپ وتران کننگا۔ چینی نیشنل ہیلتھ منسٹر نا کنڈآن بنجائی وزیر ءِ جم وجوش اٹ بخیرکننگا و پاکستان کن نیک است خواہی نا درشانی ءِ کننگا۔ اوڑدہی ٹی چینی وزیر جان جوڑی پاکستان و چین نا متکن آ سنگتی نا ستاءِ کرساپارے کہ ہڑتوم آ ملک آک ہرمشکل وخت اٹی اسہ ایلو تون ہم کوپہ سلیسنو۔ بنجائی وزیر جان جوڑی مصطفیٰ کمال کوویڈ۔19اٹی چین نا کنڈآن تروک آ امداد، خاص وڑاٹ ویکسین نا وخت آ فراوانی آ منت واری ءِ ہرفے۔ اوپارے کہ پاکستان اٹی پرائمری و ٹریژی ہیلتھ کیئر نا نیام اٹ خورکی ءِ کم کننگ کن ٹیلی میڈیسن نا مون آ دننگ المی ءِ، ودا بشخ اٹی چین نا آزموندہ غاتیان پبی فائدہ ہرفنگ انگ ءِ، وزیرجان جوڑی پارے کہ دُن تو پاکستان ءِ جان جوڑی نا بشخ اٹی کیہی چیلنج مون تروک ءِ ، ولے ہر چیلنج پوسکن ءُ وارخواہی ہم اتیک۔ پاکستان اٹی جان جوڑی نا بشخ اٹی چینی زرکارآتیکن زرکاری نا بھلو گمان اس ارے۔
