اسلام آباد۔ 30 اپریل (اے پی پی) وزیراعظم محمد شہباز شریف پارینے کہ ورناافرادی قوت ءِ ڈیجیٹل تربیت آن شُپ کننگ حکومت نا اولیت آتیٹی اوار ءِ، ڈیجیٹل سٹارٹ اپس و پیشن نا زرکاری کن پاکستان جوان انگا مارکیٹ ءِ، ڈیجیٹل انقلاب زرگزران تے پوسکن ءُ دروشم اس تننگ ءِ۔ داخیال آتا درشانی ءِ او ڈیجیٹل کوآپریشن آرگنائزیشن نا سیکرٹری جنرل دیما الیحییٰ تون گپ وتران کرساکرے ہرا چارشنبے نادے آداڑے اوڑتون اوڑدہی کرے۔ اوڑدہی ٹی بنجائی وزیرِ انفارمیشن ٹیکنالوجی شزہ فاطمہ خواجہ، سلاہکار وزیراعظم سید توقیر شاہ و تعلقدار بڑزکو کمامدارآک ہم ساڑی ئسر۔ وزیراعظم پارے کہ مچ آ دنیا غان اسہ ہزار آن زیات پوسکن آٹیکنالوجی نا زرکارو پالیسی ساز آتا پاکستان اٹ جمع مننگ، ڈیہہ اٹی پاکستان نا ڈیجیٹل بشخ اٹی ودوک آ اثرورسوخ نا نشانی ءِ۔ پاکستان نا غٹ آن نہادی میرات ننا ورناافرادی قوت آک ءُ ہرادے ڈیجیٹل کسب و تربیت آن شُپ کننگ ننا اولیت آتیٹی اوار ءِ۔ وزیراعظم پارے کہ 24 کروڑ نا آبادی والا پاکستانی زرگزران ڈیجیٹل اسٹارٹ اپس و پیشن نا زرکاری کن ڈیہہ انا جوان انگا مارکیٹ ءِ۔ حکومت نا کاروبار دوست پالیسی و زرکارآتا تروک آ آسراتی نا مسخت ملک اٹی سرمایہ تون اوار اوار پوسکن آ ٹیکنالوجی نا گدریفنگ ہم ارے۔ وزیراعظم پارے کہ حکومت ورناتیکن ڈیجیٹل ٹیکنالوجی و زرکاری نا ہندن ءُ ڈٹ درستی راستی کرفنگ ءِ ہرافتا کمک اٹ ورناافرادی قوت ءِ تینا توانائی تے سہی سمت اٹ کاریم اٹ اتنگ و اوفتے باعزت روزگار نا فراوانی آن زرگزران اٹ تینا اہ کڑد ادا کننگ اٹ کمک رسینگک۔ وزیراعظم پارے کہ ڈیجیٹل بدلی داسہ ہچ ءُ معمولی رجحان اس اف بلکن اسہ ہندن ءُ انقلاب اسے ہرا زرگزران تے پوسکن ءُ دروشم اس تننگ ءِ۔ حکومت جہانی کہول آ وقع پذیر مروک آ ڈیجیٹل بدلی اتون پاکستان ءِ ہم گرنچ کننگ کن ہرممکن گام گیج کننگ ءِ۔ ڈیجیٹل بشخ اٹی براہ راست درملکی زرکاری کن فورم نا اڈتننگ و اوٹی جہانی بشخ ہلنگ داہیت انا شاہدی ءِ کہ پاکستان جہانی ڈیجیٹل زرگزران اٹی قائدانہ کڑد انا لائخی تخک۔ ڈیجیٹل کمکار تنظیم نا سیکرٹری جنرل دیما الیحییٰ پاکستان اٹ ڈیجیٹل بشخ انا اولیکو براہ راست درملکی زرکاری فورم نا اڈتننگ آ منت واری ءِ ہرفے و پارے کہ اسلام آباد اٹی اڈہلوک آ فورم نا اولیکو دیوان اٹی بشخ ہلنگ اوکن اعزاز اسے۔
