اسلام آباد۔ 30 اپریل (اے پی پی) وزیراعظم محمد شہباز شریف چندی کمپنی تا کنڈآن انفارمیشن ٹیکنالوجی نا بشخ اٹی 700 ملین ڈالر آن زیات نا زرکاری نا ستاءِ کرسا پارے کہ پاکستان ڈیجیٹل زرگزران اٹی بدلی اتنگ ءِ، زرکارآتے پورو کمکاری نا باوری و مریس مدی شریداری کن سنبرینگوک اُن۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ وزیراعظم انفارمیشن ٹیکنالوجی بشخ انا پنی آ زرکارآتون گپ وتران کرساکرے ہراچارشنبے نادے آ داڑے اوڑتون اوڑدہی کرے۔ اوڑدہی ٹی وزیر انفارمیشن ٹیکنالوجی اینڈ ٹیلی کام شزہ فاطمہ خواجہ و بڑزکو سرکاری آفیسر آک ساڑی ئسر۔ وزیراعظم محمد شہباز شریف 29,30اپریل آ اڈ ہلوک پاکستان نا اولیکو’’ڈیجیٹل فارن ڈائریکٹ انویسٹمنٹ فورم 2025‘‘اٹی بشخ ہلوک آ پنی آ انفارمیشن ٹیکنالوجی کمپنی تا بڑزکو عہدیدار آتون وزیراعظم ہاؤس اسلام آباد اٹی اوڑدہی مس۔ غٹ شرفمند آ زرکارو کاروباری راہشون تا خیرمقدم ءِ کرسا وزیراعظم پارے کہ پاکستان تینا ڈیجیٹل زرگزران اٹی بھلو بدلی اسے نا بناءِ کننگ ءِ۔ وزیراعظم فورم نا بنائی دود اٹی پاکستان اٹی کمپنی تا کنڈآن 700 ملین امریکی ڈالر آن زیات نا زرکاری نا پڑو نا خیرمقدم ءِ کرے و پاکستان نا لائخی تیا زرکارآتا پت انا پذیرائی ءِ کرے۔ وزیراعظم ٹیکنالوجی، فنانس و جدت نا علاقائی وت جوڑ مننگ نا پاکستان نا وژنءِ تالان کرے۔ اوبروک آ مندوبین آتے برجاریگولیٹری اصلاحات، مالیاتی ترغیب و ڈیجیٹل انفراسٹرکچر زرکاری نا بارواٹی معلومدار کرے۔ وزیراعظم ورناتا تربیت تون اوار اوار زرگزران نا ڈیجیٹلائزیشن کن برجاحکومتی کوشست آتا بارواٹی ہم معلومدار کرے۔ اوزرکارآتے پورو کمکاری نا باوری کرفے و اوفتے تون مریس مدی ، تین پہ تینی وڑاٹ فائدہ مند شریداری کننگ نا عزم انا درشانی ءِ کرے۔ وزیراعظم جہانی شہرت یافتہ آئی ٹی ایگزیکٹیوزتون گپ وتران اٹی پاکستانی ورناتے آخبت نا ٹیکنالوجی آ تالان ملازمت آتیکن تیار کننگ کن اے آئی و ڈیٹاسائنس نا تعلیم نا گام گیج آتیا اوفتے تون کمکاری نا حکومت پاکستان نا است خواہی آن معلومدار کرے۔ وزیراعظم تون اوڑدہی کروک آتیٹی روسفٹ نا جبار رحیم خان، ہرا500 ملین امریکی ڈالر نا زرکاری نا پڑو کرے، اے آئیز وینچر کیپیٹل نا طحہٰ نسیم و احسن جمیل ہرا100 ملین امریکی ڈالر نا زرکاری نا پڑو کریر، مشرق بینک انا فرنینڈو موریلو و محمد ہمایوں سجاد ہرا30 ملین امریکی ڈالر نا زرکاری نا پڑوکرے، و Mindhyve.aiنا بلال کمال فاروقی ہرا 22 ملین امریکی ڈالر نا زرکاری نا پڑو اوار ئس۔
