راولپنڈی۔29اپریل (اے پی پی):پاک فوج ءَ پاکستان ءَ ھندی ناشرکاری ءِ سرجمیں ثبوت دگنیا ءِ دیم ءَ پیش کتگ انت ۔ بھارت وتی لشکر ءِ وسیلگ ءَ پاکستان ءَ ناشرکاری ءِ تہ ءَ براہ راست ھوار اِنت۔ ہندوستان ءِ فوجی افسر میجر سندیپ ورما، سوبیدار سکھوندر، ہوالدار امیت ءُ یک سپاہی یے ناشرکاراں آن لائن تربیت ءُ فنڈ دیگ ءَ انت۔ اے گپ ءُ تران ءِ سرا قبضہ کنگ بوتگ۔ دزگیریں ناشرکاراں ھم اعتراف کتگ۔ دوشمبے ءِ روچ ءَ پاک فوج ءِ پبلک ریلیشنز ڈائریکٹر جنرل لیفٹیننٹ جنرل احمد شریف چوہدری ءَ گوشت کہ پہلگام ءِ وئیل ءَ چہ 7 روچ گوستگ بلے انگت ءَ اے الزام آنی ھچ وڑیں ثبوت پیش نہ بوتگ۔ ھپت روچ اِنت ءُ اودا ایوک ءَ زبانی تبادلہ بوھگ ءَ اِنت۔ ما شمئے دیم ءَ بھارت ءِ ریاستی ناشرکاری ءِ سرجمیں شواہد پیش کنگ ءَ ایں ۔ ڈی جی آئی ایس پی آر ءَ گوشت کہ بھارت وت ریاستی ناشرکاری کنگ ءَ انت۔ اپریل ءَ جہلم ءِ نزیک ءَ بس اسٹینڈ ءَ چہ بھارت ءِ تربیت یافتہ ناشرکار عبدالمجید دزگیر کنگ بوتگ۔ دزگیریں ملزم ءَ چہ دو ءُ نیم کلو بمب برآمد کنگ بوتگ۔ آئی ءِ گس ءَ چہ ھندوستان ءِ جوڑ کتگیں ڈرون ءُ یک ملین کلدار برآمد کنگ بوتگ۔ اے ناشرکار ءِ ھنڈلر ھندی سرمچار اِنت۔ اے ھنڈلر ءِ گوں دزگیریں ناشرکار ءَ گپ ءُ تران ھم پدر بوتگ۔ ہندوستان ءَ بوتگیں گپ ءُ تران ناشرکار ءِ موبائل فون ءَ گرگ بوتگ۔ آئی ءَ گوں ہندوستان ءَ سوبیدار سکھوندر ءَ گپ ءُ تران کنگ ءَ ات۔ آئی ءَ گوشت کہ دزگیریں مردم گوں سوبیدار سکھوندر ءَ ھندوستان ءَ رابطہ کنگ ءَ بوتگ۔ اے ھال ءِ تہ ءَ چار ھندی لشکر ءِ کارندہ ءِ پجار کنگ بوتگ، اے ھندی لشکر ءِ کارمندانی تہ ءَ میجر سندیپ ورما، سوبیدار سکھوندر، ھوالدار امیت ءُ یک سپاھیگے ھوار اِنت۔ انڈیا ہینڈلر ہمے ناشرکاراں گشگ ءَ انت کہ پاکستان ءَ کارروائی بہ کن ات کہ دنیا ءَ بہ گش ات کہ ادا ناشرکاری است انت۔ بھارتی ہینڈلر ناشرکاراں ویڈیو روان دنت کہ آہاں بمب جوڑ کنگ ءِ رہبند پیش دارگ بیت۔ آئی ءَ گوشت کہ کمیونیکیشن ءِ تہ ءَ میجر سندیپ ءَ اے گپ من اِتگ کہ آ بلوچستان ءَ چہ لاہور ءَ ناشرکاری کنگ ءَ آں ۔ ستمبر ءَ سکھوندر ءَ برنالا بھیمبر ءَ تراکناکیں چیزانی پجار کتگ۔ ناشرکار عبدالمجید ءَ چہ برنالا بھیمبر ءَ تراکناکیں چیز دست کپتگ ۔ 13 اکتوبر ءَ ناشرکار ءَ ضلع باگ ءَ لشکری گاڑی ءِ سر ءَ بمب تراک کتگ ۔ اے اُرش ءَ پد لشکر ءِ سئے کارندہ ٹپیگ بوتگ اَنت۔ ناشرکار ءَ را اے بمبتراک ءِ ھاتر ءَ ھندی ھنڈلر ءَ 180 ھزار کلدار داتگ۔ ڈی جی آئی ایس پی آر ءَ گشتگ کہ 22 نومبر ءَ سکھوندر ءَ مجید ءِ ھاتر ءَ بمب ءِ گرگ ءِ ھاتر ءَ ہیڈ مارالا ءِ نزیک ءَ جاہ ءِ نشاندہی کتگ۔ ناشرکار ءَ چہ اے جاہ ءَ ھلاس بوتگیں ڈرون ءُ آئی ای ڈی زرتگ۔ نومبر ءَ عبدالمجید ءَ جلال پور جتن ءَ فوجی گاڑی ءِ سر ءَ آئی ای ڈی ایر کتگ ءُ 4 سپاھیگ ٹپیگ بوتگ اَنت۔ ٹاسک سرجمی ءِ سر ءَ ناشرکار ءَ را 656 ہزار کلدار رستگ ۔ ڈی جی آئی ایس پی آر ءَ گشتگ کہ میجر سکھوندر ءَ 18 مارچ ءَ کوٹلی ءِ نزیک ءَ آئی ای ڈی ءِ جاہ داتگ ات 19 مارچ ءَ اسکول ءِ زھگاں کوٹلی ءِ نزیک ءَ مشکوکیں بیگ ءِ نیمگ ءَ اشارہ کتگ ات۔ کوٹلی ءِ نزیک ءَ مشکوکیں بیگ ءَ چہ فوج ءِ یک یونٹے ءَ بمب برآمد کتگ۔ کوٹلی ءَ بمب ءِ برآمد کنگ ءَ پد بھارتی رسانکدر ءَ دروگیں پروپیگنڈا کتگ کہ مقبوضہ کشمیر ءَ 5 بمب برآمد کنگ بوتگ۔ اپریل 2025 ءَ سکھوندر ءَ نادالا ءِ نزیک ءَ آئی ای ڈی ءِ دیم داتگ۔ اپریل ءَ سکھوندر ءَ ناشرکار ءَ را بس اسٹینڈ ءِ سر ءَ بمب تراک ءِ ذمہ واری داتگ۔ ڈی جی آئی ایس پی آر ءَ گوشت کہ بھارت پاکستان ءَ شہری ءُ فوج ءِ سر ءَ اُرش کنگ ءِ واستہ ناشرکار آناں گولہ بارود ھم پھجارینگ ءَ انت۔ اے آئی ای ڈی ڈرون ءِ وسیلگ ءَ روان دیگ بنت، اے ھندی ناشرکاری ءِ بس یک ثبوتے ۔
