اسلام آباد۔29اپریل (اے پی پی):مزن وزیر محمد شہباز شریف ءَ گوشت کہ پاکستان ءُکزاکستان ءِ نیام ءَ بیپاری سیادی ءِ جوڑ کنگ مئے اولی ترجی انت۔ ریل لنک منصوبہ سرجمیں خطہ ءِ واستہ گیم چینجر ثابت بیت کہ ایشی ءَ چہ میاں اوستمانی ریاست گوادر بندرگاہ ءَ گوں ہمگرنچ بنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی سئے شمبے ءِ روچ ءَ کزاکستان ءِ ٹرانسپورٹ ءِ وزیر مراد کارابایف ءَ گوں گپ ءُ تران کنان ءَ کت اَنت آئی ءَ مزن وزیر ءَ گوں گند ءُ نند کت۔ مزن وزیر ءَ کزاکستان ءِ صدر کسیم جومارت توکایف ءِ واستہ نیکیں واھگ آنی درشان کت۔ مزن وزیر ءَ گوشت کہ سعودی عرب ءَ ورلڈ واٹر سمٹ ءِ وھد ءَ کزاکستان ءِ صدر ءَ گوں گند ءُ نند سک باز پائدگ مند بوتگ۔ مزن وزیر ءَ گوستگیں سال ءَ کزاکستان ءِ تر ءُ تاب ءِ ہم ذکر کتگ۔ آئی ءَ گوشت کہ آکزاکستان ءِ صدر ءِ پاکستان ءِ تر ءُ تاب ءِ ودار ءَ انت۔ کزاکستان ءِ صدر ءِ پاکستان ءِ تر ءُ تاب ءَ را پائدگ مند جوڑ کنگ ءِ واستہ یک حکمت عملی ءِ سر ءَ ترندی ءَ گوں کار کنگ بیت۔ پاکستان ءُ کزاکستان ءِ نیام ءَ ریل لنک ءِ فزیبلٹی ءِ سر ءَ کار بندات کنگ بہ بیت۔ مزن وزیر ءَ گوشت کہ پاکستان ءُکزاکستان ءِ نیام ءَ ریل ءِ رابطہ سرجمیں خطہ ءِ واستہ گیم چینجر منصوبگ ءِ رنگ ءَ ثابت بیت، ایشی ءَ چہ میاں اوستمانی ریاست آناں گوادر بندرگاہ ءَ گوں ھمگرنچ کنت۔ ریل لنک ءِ فزیبلٹی ءُ تکنیکی تک ءُ پہنات آنی بابت ءَ گپ ءُ تران کنگ ءِ واستہ یک ڈل ءِ زوت کزاکستان ءِ تر ءُ تاب کنت۔ کزاکستان پاکستان ءَ مارشل آرٹ ءُ شطرنج ءِ دیمروئی ءِ تہا کلیدی کرد پیلو کنت۔ مزن وزیر ءَ گوشت کہ وانگ ءُ زانگ ءِ پڑ ءَ دوئیں ملک آنی نیام ءَ کمک ءِ بے دروریں گنجائش است انت، کزاکستان ءِ یونیورسٹی آناں پاکستان ءَ کیمپس پچ کنگ ءِ موہ است انت، پی آئی اے ءَ را کزاکستان ءُ پاکستان ءِ نیام ءَ براہ راست بالی رابطہ آنی واستہ منصوبگ جوڑ کنگی انت، دوئیں ملک آنی نیام ءَ کاروباری سیادی آنی دیمروئی مئے اولی ترجی انت۔ گند ءُ نند ءَ کشت ءُ کشاری، معیشت، تجارت، سرمایہ کاری، آئی ٹی ءُ کمیونیکیشن ءِ شوبگاں کمک ءَ را گیش مھکم کنگ ءِ سر ءَ ھیال ریچی کنگ بوت۔ کزاکستان ءِ ٹرانسپورٹ ءِ وزیر ءَ مزن وزیر ءِ شگر ءُ منت گپت کہ پاکستان ءَ گرمیں وش اتک ءُ مہمان داری کنگ بوتگ۔ آئی ءَ گوشت کہ کزاکستان ءِ کاروباری برات ءُ سرمایہ کار آنی نیمگ ءَ پاکستان ءِ گوما کاروباری سیادی ءِ جوڑ کنگ ءِ تہ ءَ گہتری ءِ درشان کنگ بوتگ۔ پاکستان یک تیزی ءَ گوں دیمروئی کنوکیں مارکیٹ اِنت۔ کراچی ءُ گوادر ءِ بندر پہ کزاکستان ءَ مزنیں ارزشتے دار اَنت۔ اے درگت ءَ الماتی ءَ بگر داں گوادر ءَ ریل ءِ رابطہ مئے واستہ سک باز المی انت۔ پاکستان ءُ کزاکستان ءِ یکجائی بین وزارتی کمیشن ءِ 13می دیوان ءَ 10 شوبگ آنی تہ ءَ کمک ءِ واستہ فریم ورک ءِ سر ءَ دستخط کنگ بوت۔ ایشی ءَ ابید اقتصادی سیادی، زانتکاری ءُ دود ءُ ربیدگ، ٹیکسٹائل، ءُ معدنیات ءِ مھکم کنگ ءِ پڑ ءَ ھم بازیں مفاہمت نامہ ءِ سر ءَ دستخط کنگ بوتگ۔ آئی ءَ گوشت کہ کزاکستان ءَ چہ کاروباری برات ءُ سرمایہ کار آنی ڈل ھم پاکستان ءِ تر ءُ تاب ءَ انت۔ ڈل ءَ کراچی ءُ گوادر ءِ بندر ھم تر ءُ تاب کتگ اَنت۔ کاروباری ڈل ءَ کراچی ءَ بی ٹو بی ءِ گند ءُ نند ھم کتگ انت۔ گند ءُ نند ءَ وفاقی وزیر مواصلات عبدالعلیم خان، وفاقی وزیر اقتصادی امور احد خان چیما، وفاقی وزیر اطلاعات ءُ نشریات عطا اللہ ترار، وفاقی وزیر ریلوے حنیف عباسی، مزن وزیر ءِ ھاسیں کمکار طارق فاطمی ءُ سیادی داروکیں مزنیں حکومت ءِ سرکاری کارندہ آنی بھر زوری بوتگ۔
