اسلام آباد۔ 29 اپریل (اے پی پی) وزیراعظم محمد شہباز شریف پارینے کہ آئی ٹی نا بشخ اٹی پیشن نا زرکارآتے ہرممکن آسراتی فراوان کننگک، دا بشخ اٹی 70 کروڑ ڈالر نا زرکاری ورناتا لائخی تے تالان کننگ اٹ کمکار مریک۔ مصنوعی ذہانت و آئی ٹی ٹی ورناتا تعلیم و تربیت نا بھلو ڈٹ اس جوڑ کننگانے، کشت وکشار، صنعت، برآمدات و ایلو بشخ آتیٹی آئی ٹی و اے آئی آن فائدہ ہرفنگ انگ ءِ۔ سے شنبے نادے آ داڑے اڈ ہلوک ڈیجیٹل فارن ڈائریکٹ انویسٹمنٹ کانفرنس آن تران کرسا وزیراعظم مچ آ دنیا غان ڈیجیٹل مندوبین آتا کانفرنس اٹی خیرمقدم ءِ کرساپارے کہ 11 آن زیات سنگت ملک آتا آئی ٹی وزیرآک، ڈپٹی وزیر آک و آئی ٹی چاہندار آتے پاکستان آبننگ آ بخیر اٹ پانہ۔ وزیراعظم پارے کہ ڈیجیٹل دنیا اینو غٹ بشخ آتیٹی بھلو اثراس تخک۔ اِرا دہائی تا نسبت اینو نا ڈیجیٹل دنیا یکسر بدل مسنے۔ نن پنجاب اٹی تینا وزارت اعلیٰ نا دور اٹ میرٹ آ ورناتیٹی 4 لکھ لیپ ٹاپ بشخان۔ ورلڈ بینک انا پروگرام نا رداٹ دیہی زرگزران خاص کر ایگریکلچر سٹ ءِ ڈیجیٹائز کننگا۔ وزیراعظم پارے کہ پاکستان نا 60 درسد آبادی ورناتیا تالان ءِ، ہرا ڈیجیٹل دنیا ٹی دوئی وارخواہی تیان فائدہ ہرفنگ کیرہ۔ پاکستانی ورناک بھاز لائخ ءُ و او پاکستان تون اوار مچ آ دنیا ٹی نمان خذمت سرتننگ ءُ۔ وزیراعظم پارے کہ مارچ اٹی 4 ارب 10 کروڑ ڈالر نا زرراہی تس پاکستان آ گدریفنگا ہراپاکستان نا تاریخ اٹی اسہ ریکارڈ اسے۔ اوپارے کہ کانفرنس نا بشخ ہلوک آتا کمکاری و راہشونی آن نن داقابل مرینہ کہ آئی ٹی نا بشخ اٹی دنیا ٹی نمان ہند اس دوئی کے۔ نن مہالوآن دا بشخ اٹی بھلو کچ اسے آ بنجائی و صوبائی کہول آ آئی ٹی پارکس، انکیوبیشن سینٹر، پٹ وپول و شونداری نا ڈٹ ءِ عملی دروشم اس تننگانے۔ چین نا کمپنی ہواوے تون اواری اٹ سالانہ 2 لکھ خوانوک آ مار و مسن تے کسبکاری نا تعلیم تننگ اُن۔ اوغٹ زرکارو نارتھ امریکہ تون اوار ایلوکمپنی تے سلہ خلک کہ او کشت وکشار ءِ پوسکن آٹیکنالوجی آن شُپ کننگ، برآمد آتے ودفنگ، صنعت نامون آدننگ و پاکستان اٹ فائدہ روزگارءِ مون آدننگ نا بابت ننتون اواری اٹ کاریم کیر۔ وزیراعظم پارے کہ اینو نا کانفرنس اٹی کروک آ پڑو و عزم است بڈءِ۔ وزیراعظم داوخت آپاکستان اٹی تینا روسی شریدار تون اوار 50 کروڑ ڈالر نا زرکاری کننگ نا پڑوکروک آ پاکستانی تے خراج تحسین پیش کرے۔ ہنداوڑ پاکستانی فزیشنز و ایلوتا کنڈآن جم وڑاٹ 70 کروڑ ڈالر نا پڑو نا ہم خیرمقدم ءِ کرے۔ اوڈیجیٹل کوآپریشن آرگنائزیشن نا سیکرٹری جنرل دیماالیحییٰ تو ن اوار ایلومہمان تا خاص منت واری ءِ ہرفسا غٹ بشخ ہلوک آتے پاکستان اٹ زرکاری نا سلہ خلسا پارے کہ او دا تغ ءِ حقیقت اٹ بدل کننگ کن جندی وڑاٹ راہشونی و کوشست کیک۔ وزیراعظم پارے کہ بدل مفروک و سخت کوشست آتیان پاکستان آئی ٹی نا بشخ اٹی دنیا نا صف اٹی سلک۔
