بنجائی وزیر داخلہ محسن نقوی منصورہ غا بس، امیر جماعت اسلامی حافظ نعیم الرحمان تون اوڑدہی

لاہور۔ 29اپریل (اے پی پی) بنجائی وزیر داخلہ محسن نقوی سے شنبے نادے آ منصورہ نا دورہ ءِ کرے ہراڑے او امیر جماعت اسلامی حافظ نعیم الرحمان تون اوڑدہی کرے۔ دااہم اوڑدہی ٹی پاک بھارت ساڑی آ بے چیٹی، سیم تا حالیت و قومی سلامتی نا بابت امور آ گپ وتران کننگا۔ محکمہ  داخلہ نا ترجمان نا رداٹ وزیرداخلہ حافظ نعیم الرحمان ءِ نیشنل سیکورٹی کونسل ناساڑی آ فیصلہ غاتیا حوال تس و پاکستان نا اصولی موقف آن معلومدار کرے۔ اوپارے کہ بھارت نا کنڈآن کروک آ غیرمنطقی گام گیج آتا رداٹ پاکستان ہرکہول آ پرامن ولے گچین ورندی تننگ کن تیار ءِ۔ امیر جماعت اسلامی قومی موقف نا پبی تائید ءِ کرسا پارے کہ بھارت نا باندات آ مچ آ قوم یکجہتی نا درشانی ءِ کننگ ءِ۔ اوپارے کہ لکھ آ بے گناہ کشمیری تے شہید کروک آ بھارتی حکومت ہوش کے۔ ہڑتوم آ راہشون تا نیام اٹ فلسطین نا ساڑی آ حالیت آتیاہم گپ وتران مس۔ داوخت آ محسن نقوی پارے کہ بھارت رزاک اٹ سازش نا کمک اٹ ڈیہہ انا امن ءِ لتاڑنگ خواہک، ولے پاکستان نا سیاسی سرکڑدہ و قوم ہربھارتی جارحیت نا برخلاف پورو یکجان ءُ۔ اومستی پارے کہ پاکستان نا بہادر سلہہ بند فوج وطن نا دفاع کن پورو وڑاٹ تیار ءِ۔ داوخت آ جماعت اسلامی نا سینئر راہشون لیاقت بلوچ ہم ساڑی ئسک۔