اسلام آباد۔ 29 اپریل (اے پی پی) پاکستان ونیامی ایشیائی ریاست قازقستان نا نیام اٹ واپاری و اقتصادی کمکاری نا روڈ میپ و ای ٹریڈ بارواٹی مفاہمتی یات داشت آ دستخط مس، ہڑتوم آملک آک چندی بشخ آتیٹی تین پہ تینی کمکاری و رابطہ غاتا مون آ دننگ آہم امنا کریر۔ ہڑتوم آملک آتا بین الحکومتی کمیشن نا سینزدہ می دیوان سے شنبے نادے آ اڈ ہلک ہراٹی واپاری و اقتصادی کمکاری نا روڈ میپ و ای ٹریڈ بارواٹی مفاہمتی یات داشت آ دستخط کننگا۔ بنجائی وزیر اقتصادی امور احدخان چیمہ دیوان آن تران کرسا پارے کہ پاکستان وقازقستان نا نیام اٹ دہائی تیا تالان تاریخی، دودوربیدہ ئی و روحانی تعلقداری ءِ، ہڑتوم آملک آتا واپار، توانائی وکشت وکشار تون اوار چندی بشخ آتیٹی کمکاری برجاسلک۔ اوپارے کہ پاکستان وقازقستان نا نیام اٹ سفارتی تعلقداری 1992اٹی جوڑ مس، واپاری کمیشن آن واپار، توانائی، کشت وکشار و علاقائی رابطہ غاتون اوار چندی بشخ آتیٹی کمکاری ءِ مون آ دننگک، ساڑی آ سال تیٹی پاک قازق اقتصادی تعلقداری تیٹی گچینی بسنے۔ احدخان چیمہ پارے کہ ای ٹریڈ و اقتصادی روڈ میپ آ دستخط ہڑتوم آملک آتا تعلقداری مزل نا نشان ءِ، معاہدہ غاتیان ہڑتوم آملک آتا واپار ءِ ودفنگک۔ اوپارے کہ ہن و بر و لاجسٹک نا بشخ آتیٹی تین پہ تینی واپار نا بھلو وارخواہی اس ساڑی ءِ، قازقستان تون ٹرانزٹ ٹریڈ معاہدہ زوت گمانی ءِ، پاکستان و قازقستان نا نیام اٹ کثیر الجہتی واپاری راہداری نا جوڑ کننگ ستاکڑزک۔ اونا پاننگ ئس کہ کراچی ٹی بزنس ٹو بزنس فورم اٹی قازق کمپنی تا پبی بشخ ہلنگ ستاکڑزک، قازق چاہندار آتا گوادر و کراچی بندرگاہ تا دورہ غان واپاری رسینگ اٹی گچینی بریک۔ بنجائی وزیرپارے کہ لاہور و ترکستان نا نیام اٹ ٹوئننگ معاہدہ ہم زوت گمانی ءِ، حکومت سیل و سوات ءِ مون آدننگ کن کوشست کننگ ءِ، پاکستان اٹ زرکاری کن چاگڑد رکھ و وارخواہی زیات ءِ۔ اوپارے کہ جوائنٹ کمیشن ہڑتوم آملک آتا عزم و شریداری نا ڈیک ءِ ایتک، پاکستان قازقستان تون عملی گام گیج آتا کمک اٹ معاہدہ غاتیا عملدرآمد کن سنبرینگوک ءِ۔
