اسلام آباد۔ 29 اپریل (اے پی پی) بنجائی وزیر سائنس و ٹیکنالوجی خالد حسین مگسی تون چیک ریپبلک نا سفیر نا کماشی ٹی بڑزکو کہولی ڈل اوڑدہی کرے۔ سے شنبے نادے آ وزارت سائنس و ٹیکنالوجی آن جاری بیان نا رداٹ اوڑدہی ٹی سائنس و ٹیکنالوجی نا چندی بشخ آتیٹی کمکاری ءِ ودفنگ آ گپ وتران کننگا۔ چیک ریپبلک نا سفیر پاکستان اٹی مون آ بروک آ ٹیکنالوجی تا بشخ اٹی اسکالر شپ تننگ نا سلہ خلک ہراہڑتوم آ ملک آتا نیام اٹ علمی و پٹ وپولی تعلقداری تا مون آ دننگ نا کنڈآ اسہ اہم ءُ گام اسے۔ اوڑدہی ٹی سائنس، ٹیکنالوجی و مون آ بروک سائنسز اٹی ہڑتوم آکنڈآتا کمکاری ءِ ودفنگ آ ہم گپ وتران کننگا۔ بنجائی وزیر جہانی انوویشن انڈیکس اٹی پاکستان نا گچین درجہ بندی ءِ ستاکڑزوک گوندساپارے کہ پاکستان نا لائخ آ افرادی قوت مچ آ دنیا ٹی بڑزکو معاوضہ غاتیا کاریم کننگ ءُ ۔ داوخت آ اوپاکستان نا ٹیکنالوجی نا بشخ اٹی شونداری و جہانی کہول آ اوناہند ءِ تالان کرے۔ اوداہیت آ ہم زور شاغا کہ پاکستان نا افرادی قوت نا شونداری کن پین گام گیج آتا گرج ءِ تانکہ جہانی کہول آ ملک انا پین جوان ہند دوئی کننگ مرے۔ خالد حسین مگسی اوڑدہی ٹی میٹرولوجی نا اہمیت نا ذکر ءِ کرسا پارے کہ صنعت آتا شونداری و آب ءِ پک کننگ کن دا بشخ انا سوگوی المی ءِ۔ اوچیک ریپبلک نا منت واری ءِ ہرفے کہ اوورناسائنسدان و ٹیکنالوجسٹس آتا لائخی تیٹی ودکی کن پیش کش کرینے ہراہڑتوم آ ملک آتا نیام اٹ علم و ٹیکنالوجی ٹی کمکاری نا پوسکن ءُ درگہ ملک۔
