اسلام آباد۔29اپریل (اے پی پی): وفاقی وزیر بین صوبائی ہم آہنگی رانا ثنا اللہ ءَ گوں قزاقستان ءِ سیل ءُ سواد ءُ اسپورٹس ءِ کمکار وزیر یرزن یرکنبایف ءُ قزاقستان ءِ میاں اوستمانی تجارت ءِ اتاق ءِ صدر کنات علین ءَ گوں گند ءُ نند کت۔ گند ءُ نند ءَ پاکستان ءُ قازقستان ءِ نیام ءَ لیب ءُ گوازی ءُ سیل ءُ سواد ءِ شوبگ ءَ کمک ءَ را دیمروئی دیگ ءِ سر ءَ ھیال ریچی کنگ بوت۔ رانا ثناء اللہ ءَ دوئیں ملک آنی نیام ءَ دوستی ءِ سیادی ءَ را ساڑات ءُ جتا جتائیں شوبگ آنی تہ ءَ عملی کمک ءِ وسیلگ ءَ ایشی ءَ را گیش مھکم کنگ ءِ ضلورت ءِ سر ءَ زور پر دات۔ رانا ثنا اللہ ءَ گوشت کہ ھاکی، اسکواش ءُ اسنوکر ءِ وڑیں لیب آنی تہ ءَ پاکستان قازقستان ءَ را ٹیکنیکل کمک کنت، تانکہ اے لیب آنی دیمروئی کنگ بہ بیت۔ ایشانی تہ ءَ زالبول آنی لیب ءُ گوازی آنی تہ ءَ بھر زوری ءِ واستہ ھاسیں گامگیج آنی سر ءَ ھم ھیال ریچی کنگ بوت ءُ گوشت کہ اے درگت ءَ یکجائی حکمت عملی جوڑ کنگ بوت کنت۔ وفاقی وزیر ءَ ورنا آناں جوانیں کاروائی آنی نیمگ ءَ راجیگ کنگ ءِ واستہ اسپورٹس ایکسچینج پروگرام آناں سک باز کارآمد لیک اتگ۔ گند ءُ نند ءِ ساھت ءَ دوئیں ملک آنی اسپورٹس ادارگ آنی نیام ءَ شریکداری ءُ کمک ءَ را گیش کنگ، کوچ ءُ ماہرین آنی تبادلہ، تربیتی پروگرام آنی برجم دارگ ءِ سر ءَ تپاک کنگ بوت۔ رانا ثناء اللہ ءَ وتی اے جزم ءِ درشانی کت کہ پاکستان کھیڈ آنی دیمروئی ءِ واستہ قازقستان ءِ گوما نزیکی ءَ گوں کمک ءَ برجاہ دار ایت، تانکہ نہ ایوک ءَ دو نیمگی سیادی مھکم بہ بنت بلکیں نوکیں نسل ءِ ٹیلنٹ آناں ھم پدر کنگ بہ بیت۔
