اسلام آباد۔29اپریل (اے پی پی): وفاقی جان سلامتی ءِ وزیر مصطفیٰ کمال ءَ چین ءَ برجم داشتگیں انٹرنیشنل میڈیکل اینڈ انوویشن سینٹر ءِ کنونشن ءَ پاکستان ءِ نمائندگی کنان ءَ چینی دوائی ءُ طبی سامان جوڑ کنوکیں کمپنی آناں پاکستان ءَ پیداواری یونٹ جوڑ کنگ ءِ دعوت دات۔ آئی ءَ گوشت کہ پاکستان ءَ سرمایہ کاری ءِ بے کساس موہ است انت ءُ حکومت درملکی سرمایہ کار آناں ھمک رنگ ءِ آسراتی پجاری کنگ ءَ انت۔ اے دیوان ءَ چین ءِ مزنیں سروکی، شنگھائی تعاون آرگنائزیشن ءِ سیکرٹری جنرل، بیلاروس ءِ نائب مزن وزیر، باسکیں ملک آنی جان سلامتی ءِ وزیر ءُ طبی ماہرین ءَ بہر زرتگ۔ افتتاحی مراگش ءَ پد نمائندگاں طبی سامان ءُ نوکیں ٹیکنالوجی ءِ سر ءَ بنیات ءِ نمائش ءِ ھم تر ءُ تاب کت۔ وزیر جان سلامتی مصطفیٰ کمال ءَ پاکستان ءَ جاری ٹیلی میڈیسن منصوبگ آنی سر ءَ زور پر دات ءُ گوشت کہ ٹیلی میڈیسن پرائمری ءُ سیکنڈری جان سلامتی ءِ نیام ءَ فرق ءَ را گیش کنگ ءِ واستہ یک جوانیں گیواری یے، ایشی ءِ دیمروئی ءَ چہ نادراھی آناں وھد ءِ سر ءَ گر ءُ دار ءُ پٹ ءُ پول کنگ بوت کنت۔ آئی ءَ گوشت کہ پاکستان یک نوکیں منصوبگ ءِ سر ءَ کار کنگ ءَ اِنت ایشی ءِ چیر دستی ءَ شہری آنی میڈیکل ریکارڈ نادرا ءِ شناسنامہ ءَ گوں یکجا کنگ ءَ چہ ایمنی کنگ بیت۔ اے منصوبگ ءِ چیر دستی ءَ جان سلامتی ءِ جامع ءُ مستندیں ڈیٹا ءِ کمک ءَ وزارت جان سلامتی ءَ را گیش موثر پالیسی جوڑ کنگ ءِ اہل بیت کہ ایشی ءَ چہ نادراہی ءِ پیش گوئی ءُ علاج ممکن بیت۔ وزیر جان سلامتی ءَ گوشت کہ حکومت پاکستان ءَ روایتی چینی دوا آنی دیمروئی کنگ ءِ واستہ جزمیگ انت ءُ اے درگت ءَ عملی گامگیج زورگ ءَ انت۔
