اسلام آباد۔29اپریل (اے پی پی): چیک ریپبلک ءِ سفیر ءِ سروکی ءَ مزن تک ءِ ڈل ءَ سائنس ءُ ٹیکنالوجی ءِ وفاقی وزیر خالد حسین مگسی ءَ گوں گند ءُ نند کت۔ سئے شمبے ءِ روچ ءَ وزارت ءِ سائنس ءُ ٹیکنالوجی ءِ نیمگ ءَ جاڑی بوتگیں بیان ءِ رد ءَ گند ءُ نند ءَ سائنس ءُ ٹیکنالوجی ءِ جتا جتائیں شوبگ آنی تہ ءَ کمک ءِ تہ ءَ گیشی ءِ سر ءَ ھیال ریچی کنگ بوتگ۔ چیک ریپبلک ءِ سفیر ءَ پاکستان ءَ نوکیں ٹیکنالوجیز ءِ شوبگ ءَ اسکالرشپ پجاری ءِ پیشکش کتگ ایش دوئیں ملک آنی نیام ءَ اکیڈمک ءُ پٹ ءُ پولی سیادی آناں دیمروئی دیگ ءِ ھاتر ءَ یک ھاسیں گامگیج اِنت۔ گند ءُ نند ءَ سائنس، ٹیکنالوجی، ءُ نوکیں سائنس آنی تہ ءَ دو نیمگی کمک ءَ را گیش کنگ ءِ سر ءَ ھم ھیال ریچی کنگ بوت۔ وفاقی وزیر ءَ گلوبل انوویشن انڈیکس ءَ پاکستان ءِ گہتریں درجہ بندی ءَ را وش اتک کت ءُ گوشت کہ پاکستان ءِ ازمکاریں ورک فورس سرجمیں دگنیا ءَ مزنیں پگار ءِ سر ءَ کار کنگ ءَ انت۔ اے موہ ءِ سر ءَ آئی ءَ ٹیکنالوجی ءِ شوبگ ءَ پاکستان ءِ دیمروئی ءُ جھان ءِ پڑ ءَ پاکستان ءِ بستار ءِ سر ءَ چمشانک دات۔ آئی ءَ اے گپ ءِ سر ءَ ھم زور پر دات کہ پاکستان ءِ کار ءِ توان ءَ را دیمروئی دیگ ءِ واستہ گیشاں چہ گیش گامگیج لوٹ ایت تانکہ ملک جھان ءِ پڑ ءَ جوانیں بستار ءَ سر بہ بیت۔ خالد حسین مگسی ءَ گند ءُ نند ءَ میٹرولوجی ءِ ارزشت ءِ سر ءَ گوشت کہ اے شوبگ ءِ مھکم کنگ صنعت آنی دیمروئی ءُ کوالٹی ءَ را دل یکیمی کنگ ءِ واستہ المی اِنت۔ آئی ءَ چیک ریپبلک ءِ منت گپت کہ آئی ءَ ورنا سائنسدان ءُ ٹیکنالوجی زانت آنی ازمکاری آناں گیش کنگ ءِ پیشکش کتگ، ایشی ءَ چہ دوئیں ملک آنی نیام ءَ زانت ءُ ٹیکنالوجی ءِ تہ ءَ کمک ءِ واستہ نوکیں دروازگ پچ بنت۔
