اسلام آباد۔ 28 اپریل (اے پی پی) بنجائی وزیر اوورسیز پاکستانیز و شونداری انسانی وسیلہ چوہدری سالک حسین ءِ مالی سال 2024-25نا مسہ سہ ماہی تیٹی ایمپلائز اولڈ ایج بینیفٹس انسٹی ٹیوشن (ای او بی آئی) نا کارکڑد نا بابت حوال تننگا۔ دوشنبے نادے آ ای او بی آئی آن جاری پریس ریلیز نا رداٹ حوال اٹی بنجائی وزیر ءِ پاننگاکہ چیئرمین ای او بی آئی خاقان مرتضیٰ نا ستمبر 2024اٹی ریٹائرمنٹ آن پد ادارہ نا سینئر انگا آفیسر ڈاکٹر جاوید اے شیخ ءِ چیئرمین نا قائم مقام چارج ءِ تننگا۔ اوبنجائی وزیر اوورسیز پاکستانی و ہیومن ریسورس ڈویلپمنٹ و بنجائی سیکرٹری ڈاکٹر ارشد محمود نا متحرک چاروکی ٹی ادارہ ءِ گچین سروس ڈیلیوری و کارکڑد نا کنڈآ سرسہبی اٹ ہِننگ ءِ۔ بنجائی وزیر چوہدری سالک حسین پدریسہ ای او بی آئی نا کارکڑد نا چاروکی ءِ کرسا و ادارہ نا انتظامیہ غان ہفتہ وار رپورٹ ہلسا کرے۔ شفافیت و میرٹ آ اونا زور شاندار نتیجہ تس۔ حوال اٹی پاننگا کہ ادارہ مالی سال 2024-25نا اولیکو مسہ سہ ماہی تیٹی 116 ارب روپئی نا تاریخی آمدن دوئی کرے، ہراکہ 40 درسد نا بے مثال شونداری ءِ ظاہرکیک۔ پنشنر و آپریشنل خڑچ آتا ادائیگی آ ن پد ای او بی آئی بیرہ نہہ تُو تیٹی تینا فنڈ اٹی 72.23 ارب روپئی نا ودکی کرے۔ ساڑی آ چیئرمین نمان اصلاحات درستی راستی کرفے ہرافتے ٹی ’’فارمولاپنشن‘‘نا نفاذ اوار ءِ ہرانا کمک اٹ مریس خذمت سرتروک آ کارندہ غاتے زیات پنشن فراوان کننگا۔ او ہمو ریٹائرڈ ملازم آتیکن کم از کم پنشن نا بحالی نا ہم مخ تفی ءِ کرے ہرافتا ادارہ کانودی جھیڑہ غاتیٹی اختہ ئسر۔ اونا کماشی ٹی بڑزکو کہولی بورڈ دیوان اس اڈ ہلک ہراٹی بورڈ آف ٹرسٹیز(بی اوٹی) یکم جنوری 2025 آن کم از کم پنشن اٹی 15 درسد ودکی نا سلاہ منظور کرے۔ داتاریخی فیصلہ داسہ بنجائی کابینہ نا گڈیکو منظوری نا چاری ءِ و داڑآن کم و ود پنچ لکھ پنشنرآتے فائدہ رسینگک، وخت اس کہ سالانہ مالی اثرآتا کساس 10 ارب روپئی ءِ۔ ای او بی آئی ءِ شدید افرادی قوت نا کمتی مون تروک ئس و ادارہ تینا منظور مروک کچ انا بیرہ 38 درسد آ کاریم کریکہ ہراڑآن سروس ڈیلیوری زہمی مسکہ، دا چیلنج ءِ مون آتخسا ساڑی انتظامیہ لاہور یونیورسٹی آف مینجمنٹ سائنسز(لمز) انا کمک اٹ اسہ سخت امتحانی عمل اسے آن گچین مروک آاومیتدار آتا بھرتی نا عمل ءِ ترند کرے۔
