پشاور۔ 28 اپریل (اے پی پی) سویلی وزیرستان نا علاقہ واناٹی امن کمیٹی نا دفترنا خڑک مروک آ دھماکہ ٹی 7 بندغ زوال و 15 ٹھپی مسنو، دھماکہ ٹی امن کمیٹی نا دفتر پورو وڑاٹ بھس مس۔ ڈپٹی کمشنر ناصر خان نا رداٹ، دا دھماکہ امن کمیٹی نا دفترنا خڑک آمس، ہراٹی نہادی جون تا نسخان مس، ٹھپی تے دمدستی وڑاٹ ہیڈ کوارٹرہسپتال واناغا گدریفنگ انگ ءِ۔ پولیس کمامدارآتا پاننگ ءِ کہ دھماکہ نا شدت ہنداخہ زیات ئس کہ امن کمیٹی نا دفترپورو وڑاٹ بھس مس، دااست ہسون واقعہ نا جاست وپاست برجاءِ و کانود نافذ کروک آ ادارہ غاک دادھماکہ نا زموارآتا دزگیری کن کارروائی کننگ ءُ۔ ڈسٹرکٹ ہیڈ کوارٹرہسپتال وانا نا کنڈآن جاری بیان اٹی پاننگانے کہ سویلی وزیرستان وانا ٹی بمب دھماکہ ٹی داتم اسکان نا حوال آتا رداٹ 7 بندغ زوال کرینو وخت اس کہ پولیس پارے کہ دھماکہ غان پد کیہی بندغ آک کیرغ مسنو۔ کمکی کارندہ غاک کیرغ مروک آ بندغ آتے کشسا ہسپتال آ گدریفیر۔ داکان بیدس سلاہکار جان جوڑی خیبرپختونخوا احتشام علی دھماکہ نا مذمت ءِ کرساپارے کہ داتم اسکان 7 بندغ آتا لاش آتے وانا ہسپتال آ اتنگانے وخت اس کہ ہسپتال اٹی 15 ٹھپی تے ہم اتنگانے۔ اونا پاننگ ئس کہ ہسپتال اٹی ایمرجنسی نافذ کننگانے۔
