اشک آباد۔ 28 اپریل (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال ترکمانستان نا دورہ غا سرمسنے ہراڑے او اقتصادی کمکار تنظیم (ای سی او) نا اولیکو فورم پائیدار شونداری ٹی بشخ ہلنگ ءِ۔ دادورہ پاکستان نا ’’اڑان پاکستان‘‘ گام انا رداٹ ڈیہہ اٹی رابطہ کاری، اقتصادی انضمام و پائیدار شونداری نا عزم انا درشانی ءِ۔ اشک آبادآسرمننگ آ وزیر ڈٹ بندی پاکستان نا سفارت خانہ نا دورہ ءِ کرے و سفارتی عملہ و پاکستانی کمیونٹی نا باسک آتون اوڑدہی کرے۔ تینا تران اٹی سینیٹر احسن اقبال پاکستان وترکمانستان نا نیام اٹ اقتصادی کمکاری نا بے پناہ گمان تیا زور شاغا۔ اوپارے کہ علاقائی کمکاری ءِ مون آ دننگ’’اڑان پاکستان ‘‘ نا رداٹ اسہ شونہال و شون ہلوک پاکستان نا وژن کن بے کچ اہم ءِ۔ پروفیسر احسن اقبال ترکمانستان آن پاکستان گیس پائپ لین ڈٹ انا زوت پوروی آ اومیت نا درشانی ءِ کرے ، ہراڑآن ترکمانستان نا توانائی کوڑی پاکستان و ایلو جہانی منڈی تسکان سرمننگ کیک۔ اوپارے کہ دا ڈٹ علاقائی توانائی رکھ اٹی اہم کڑد ادا کیک و پاکستان نا سوز توانائی نا گدریفنگ ءِ مون آدیک، ہرا چاگڑدی چیلنج آتون مون تننگ و غٹ اکن پائیدار توانائی نا فراوانی کن المی ءِ۔ وزیر ڈٹ بندی ترکمان توانائی کمپنی تے پاکستان اٹ کاروباری سرجزآتے قائم کننگ نا سلہ خلسا پاکستان نا گچین مروک زرگزرانی ٹک، مالیاتی نظم وضبط و زرکاردوست پالیسی تے تالان کرے۔
