واشنگٹن ڈی سی۔ 28 اپریل (اے پی پی) بنجائی وزیر خزانہ سینیٹر محمد اورنگزیب پارینے کہ پاکستان اسہ اہم ءُ موڑاسے آ سرمسنےہراڑے زرگزران بحالی و بدلی نا کنڈآ ہنانے، ساڑی حکومت مشکل آتا گواچی زرگزران ءِ سنبھالا، بنداوی پنجر ءِ سوگو کرے، پت ءِ بحال کرے و شونداری نا عمل دُوارہ بناکرے۔ داخیال آتا درشانی ءِ بنجائی وزیر خزانہ ہارورڈ یونیورسٹی ٹی اڈ ہلوک ’’پاکستان کانفرنس 2025‘‘آن اہم ءُ تران اسے ٹی کرے۔ تینا تران اٹی وزیرخزانہ ’’فاصلہ غاتیٹی کمتی و آخبت نا جوڑ کننگ:پاکستان اٹی شمولیتی شونداری و حکمرانی نا کسر‘‘ نا سرحال ءِ مون آتخا و پاکستانی زرگزران اٹی گچینی نا سفر ءِ تالان کرے۔ بنجائی وزیر خزانہ محمد اورنگزیب پارے کہ پاکستان اسہ اہم ءُ موڑاسے آٹی ءِ، ہراڑے زرگزران بحالی و بدلی نا کنڈآہنانے۔ اوپارے کہ ساڑی حکومت اسہ مشکل آتا گواچی زرگزران ءِ سنبھالا، بنداوی پنجر ءِ سوگو کرے ، پت ءِ بحال کرے و شونداری نا عمل دُوارہ بناکرے۔ وزیرخزانہ زور شاغا کہ سوگوی مزل اس اف بلکن شونداری نا ذریعہ ءِ۔ اوحکومتی حکمت عملی آ ہیت کرسا مالیاتی نظم و ضبط، کبینی نا مون ءِ توننگ، توانائی، خراج ، حکمرانی و سرکاری ادارہ غاتا اصلاحات نا خاکہ ءِ پیش کرے۔ اوپاکستان اٹی شونداری نا بھلا وارخواہی، کون آ معدنی وسیلہ، آئی ٹی بشخ انا ودفنگ، گرین انرجی ڈٹ و ورناآبادی نا کاروباری جوزہ غاتے ہم مون آتخا۔ اوپارے کہ انسانی شونداری ءِ پدریسہ و جوان شونداری کن بنداو جوڑ کروئی مریک۔ وزیرخزانہ پارے کہ پاکستان وام تا جی ڈی پی نا کچ 75 درسد آن کم کرسا 67.2 درسد کرینن و نیامی مد اٹی اواوفتے 60 درسد آن ہم شیف اتنگ نا ہدف ءِ ۔ اوپارے کہ نسخان اٹی چلینگوک آ سرکاری ادارہ غاتا شفاف نجکاری آن جی ڈی پی ٹی سالانہ 2 درسد بچت گمانی ءِ۔ مالیاتی بشخ اٹی ڈیجیٹل بینکنگ، کیپٹل مارکیٹس و گرین فنانس ءِ مون آ دننگ نا ڈٹ آتا پڑو نا ذکر ءِ کرسا، وزیرخزانہ پارے کہ پاکستان مالیاتی نظام ءِ پین سوگو کننگ کن سنبرینگوک ءِ۔
