اسلام آباد۔27اپریل (اے پی پی):اوورسیز پاکستانی ءُ انسانی وسیلگ آنی دیمروئی ءِ وفاقی وزیر چوہدری سالک حسین ءَ پیسریگیں امریکی صدر جو بائیڈن ءِ گوما ویٹیکن سٹی ءَ ھاسیں گند ءُ نند کت ءُ پاکستان ءُ امریکہ ءِ نیام ءَ دو نیمگی سیادی آناں گیش مھکم کنگ ءِ سر ءَ گپ ءُ تران کت۔ دوئیں آں امریکہ ءَ پاکستانی آناں روزگار ءِ موہ پجارینگ ءِ سر ءَ ھم زور پر دات۔ ادا جاڑی بوتگیں پریس ریلیز ءِ تہا گشگ بوتگ کہ وفاقی وزیر ءَ اٹلی ءَ پاکستانی سفارتخانہ ءِ تر ءُ تاب کتگ ءُ اٹلی ءَ نندوکیں اوورسیز پاکستانی آں آسراتی پجاری ءِ بابت ءَ سرپد کنگ بوتگ۔ وفاقی وزیر ءَ گوشت کہ درملک ءَ پاکستانی آناں روزگار ءِ پجارینگ ءَ پاکستانی سفارتخانہ کلیدی کرد ءَ پیلو کت کن اَنت۔ چوہدری سالک حسین ءَ بنگلہ دیش ءِ عبوری حکومت ءِ سروک محمد یونس ءَ گوں ھم گند ءُ نند کتگ ءُ دوئیں ملک آنی نیام ءَ سیادی ءَ را گیش مھکم کنگ ءِ سر ءَ گپ ءُ تران کتگ۔ گند ءُ نند ءِ تہا پاکستان ءُ بنگلہ دیش ءَ مزدور ءِ کوالٹی ءُ آہانی ہنر ءُ ہنر ءَ را گہتر کنگ ءِ ھاتر ءَ یکجائی ءَ کار کنگ ءِ سرا تپاک کتگ۔ محمد یونس ءَ گوشت کہ بنگلہ دیش ءَ پاکستانی کاروباری مردم ءُ سوداگر آنی واستہ مزنیں موہ است انت۔ وفاقی وزیر ءَ ویٹیکن سٹی ءَ فیفا ءِ صدر جیانی انفانٹینو ءَ گوں ھم گند ءُ نند کتگ آئی ءَ پاکستان ءَ جھان ءِ درجہ ءِ فٹبال ءِ توسیپ کتگ۔ چوہدری سالک حسین ءَ امارات، روس، ملائیشیا ءُ سنگاپور ءِ وزیراں گوں ھم گند ءُ نند کتگ۔
